Чӑваш Енре радио хумӗсем саракан пӗрремӗш передатчике 1926-мӗш ҫулхи юпа уйӑхӗнче Шупашкарта ӗҫлеттерсе пӑхнӑ. Шӑпах ҫавӑн чухне эфира чи малтанхи чӑвашла тата вырӑсла кӑларӑмсем тухнӑ.
Паянхи куна республикӑра вун-вун радиостанци ӗҫлет. Вӗсенчен чи асли те сумли - Пӗтӗм Раҫҫейри патшалӑх телерадиокомпани йышне кӗрекен Чӑваш радио. Кӑҫал вӑл эфира тухма пуҫланӑранпа 98 ҫул ҫитет. Ҫулӗсем нумай пулин те хальхи пурнӑҫ уттинчен юлмаҫҫӗ пирӗн ӗҫтешсем.
Эфирта тухса тӑракан кӑларӑмсене пӗтӗмпех социаллӑ сетьсенче тупса итлеме пулать. Радион хӑйӗн страницисем чи анлӑ сарӑлнӑ интернет пӗрлӗхӗсенче пур. Итлекенсене кӑсӑклантарас тӗллевпе ӗҫе ҫӗнӗлӗхсем кӗртсех пыраҫҫӗ журналистсем.
Чӑваш радио эфирӗнче культура, экономика, спорт, медицина, ача-пӑча ыйтӑвӗсене ҫутатакан передачӑсем куллен тухаҫҫӗ. Вӑл шутра 8 хутччен чӑвашла тата вырӑсла хыпарсен кӑларӑмӗсем. Вӗсене эфирта ҫеҫ мар, Чӑваш патшалӑх телерадиокомпанийӗн сайтӗнче тӳрремӗнех итлеме пулать.
Чӑваш радио ӗҫченӗсем ҫулсерен ҫӗнӗ проектсем йӗркелеҫҫӗ. Кӑҫал ҫӗршыври Ҫемье тата республикӑри Экологи культурин ҫулталӑкӗсене халалланӑ кӑларӑмсем пуҫарнӑ. Вӗсенче ятлӑ-сумлӑ, нумай ачаллӑ ҫемьесемпе паллаштараҫҫӗ, тӑван тавралӑха упрассипе ҫыхӑннӑ ыйтусене ҫутатаҫҫӗ.
Чӑваш радио - республика сасси, теҫҫӗ. Пирӗн ӗҫтешсен куҫа курӑнман ӗҫӗ тӑван регионӑн аталанӑвӗнче малашне те пӗлтерӗшлӗ вырӑнта пуласса шансах тӑратпӑр.
Оксана Верликова, Андрей Шоклев
