Карачура ялӗнчи ӑратлӑ вӑкӑрсем ӗрчетекен хуҫалӑх Чӑваш Енре кӑна мар, кӳршӗ регионсемшӗн те тӗслӗх вырӑнӗнче. Кунта хатӗрлекен паха вӑрлӑхпа республикӑри чылай хуҫалӑхри ӗнесене пӗтӗлентереҫҫӗ. Ҫапла майпа сӗт тухӑҫлӑхне ӳстереҫҫӗ. Ӑратлӑ выльӑх уссине ҫирӗплетекен тӗслӗхе шырама аякка каймалла мар. Шупашкар районӗнчи "Ольдеевски" хуҫалӑх ферминче акӑ, талӑкра 60 литр сӗт антаракан ӗнесем те пур. Кӑҫал кӑна кунта сӑвӑм выльӑх пуҫне 4 процент ӳснӗ. Агрофирма пахча-ҫимӗҫ, улма-ҫырла тата ытти ӳсентӑран ҫитӗнтерессине те пысӑк тимлӗх уйӑрать. Регион ертӳҫи районти "Энерги" пӗрлешӳ ӗҫӗпе те паллашрӗ. Кунти икӗ цехра уйӑхра миллион та 300 пин мӑшӑр перчетке кӑлараҫҫӗ. Пӗлтӗр кӑна ҫӗвӗ цехӗ хута янӑ, 50 миллион тенкӗ тӑккаласа 17 ҫӗнӗ ӗҫ вырӑнӗ тунӑ.
Алексей Енейкин, Святослав Петров
