Йӑлана кӗнӗ слёт кӑҫал 200 ытла фермера пӗрлештерчӗ. Ҫак йышра ят-сум ҫӗнсе илнисем те, хуҫалӑхне нумай пулмасть йӗркеленисем те пур. Пӗр-пӗринчен вӗренмелли вӗсен сахал мар. Шӑмӑршӑ тӑрӑхӗнчи "Победа" пӗрлешӳ ертӳҫи Артём Саблин, сӑмахран, хӑйӗн ӗҫӗпе социаллӑ сетьсенче паллаштарса тӑрать. Ҫакӑ ял хуҫалӑхне ҫамрӑк специалистсене илӗртме пулӑшмалла. - Паянхи кун фермӑра таса, тирпейлӗ пулнине, хирте хӑватлӑ трактор-комбайн ӗҫленине кӑтартмалла, - тет Артём. Шупашкар тӑрӑхӗнчен ҫитнӗ Алексей Андреев та унпа килӗшет. Вӑл та медиа-уҫлӑхра хӑйӗн ӗҫӗ пирки каласа парать. Ку туянакансем тупма, вӗсен шухӑш-кӑмӑлне пӗлме кирлӗ.
Пӗлтӗр слётра Пӗтӗм Раҫҫейри "Халӑх фермерӗ" ассоциацин республикӑри пӗрлешӗвӗ чӑмӑртанчӗ. Халӗ ун йышӗнче 45 фермер. Ҫулталӑкри ӗҫ-хӗлӗпе пухӑннисене ассоциаци ертӳҫи Леонид Кузнецов паллаштарчӗ.
Иккӗмӗш ҫул республикӑра фермерсен рейтингне йӗркелеҫҫӗ. Ӑна "Агро-Инновации" предприяти хатӗрлет. 20 кӑтартӑва шута илнӗ: ҫӗр лаптӑкне, выльӑх, техника шутне, ӗҫ укҫи мӗн чухлӗ тӳленине, тупӑшлӑхне тата ыттине те. Слётра пӗрремӗш вунӑ вырӑна йышӑннӑ фермерсене чысларӗҫ. Ҫӗнтерӳҫӗ ята Канаш тӑрӑхӗнчи Алексей Макаров тивӗҫрӗ. Пин ытла гектар ҫӗрпе усӑ курать вӑл. Мӑйракаллӑ шултра выльӑх ӗрчетет.
Патшалӑх грантсем пама пуҫланӑранпа фермерсен юхӑмӗ Чӑваш Енре ҫулсерен вӑйланса пырать. 5 ҫул каялла бюджетран уйӑракан пулӑшу виҫи 15 ҫурӑ процент пулнӑ пулсан, пӗлтӗр вӑл 28 процентпа танлашнӑ.
Слётра ҫавӑн пекех ҫитес 5 ҫулти тӗллевсене сӳтсе яврӗҫ. Ҫав шутра кооперативсене кӗрекен фермерсен йышне, вӗсен тупӑшне ӳстерес, муниципалитетсенче фермер пасарӗсене йӗркелес тӗлӗшпе ӗҫлеме палӑртрӗҫ пухӑннисем.
Екатерина Фомина, Святослав Петров
