Чӑн малтан агромаркета ӑҫта вырнаҫтарассине татса памалла пулнӑ, ку тӗлӗшпе анлӑ тӗпчев те ирттернӗ. Ун пӗтӗмлетӗвӗ тӑрӑх, "Каскад" суту-илӳ центрӗ тивӗҫтернӗ. "Пехет" чӑвашла ятне халӑх суйласа ырланӑ.
Комплексӑн юлашки хутӗнче хамӑр патра туса кӑларнӑ продукцине сутма пуҫласшӑн. Ҫавна май кунта тӗплӗ юсав туса ирттермелле. Проект ҫак кунсенче патшалӑх экспертизи тухнӑ. Смета тӑрӑх, агромаркета хута яма 150 ытла миллион тенкӗ кирлӗ, чылай пайӗ пӳлӗмсене ҫӗнетме каять, тепӗр пайӗ - хатӗрсем туянма. Укҫи-тенкине республика хыснинчен пӑхса хунӑ. Проектпа килӗшӳллӗн кунта 100 ытларах суту вырӑнӗ пулать. Унсӑр пуҫне тавар сӗнекенсемпе туянакансене меллӗ пултӑр тесе темиҫе зона палӑртса хунӑ: калӑпӑр, апатланмалли уйрӑм лаптӑк пулмалла. Чӑваш Енри фермерсемпе предприятисем кунта хӑйсен продукцине тӳрремӗн вырнаҫтараяҫҫӗ, хула ҫыннисем хамӑр патра туса кӑларнӑ паха апат-ҫимӗҫе пӗр вырӑнта туянма пултараҫҫӗ. Шупашкара курма килекен туристсем те пушӑ алӑпа таврӑнмаҫҫӗ.
Ирина Николаева, Виктор Степанов
