Фермерсене ал-ура ҫавӑрса яма "Агростартап" грант пулӑшать

- Пыл хурчӗсем ӗҫленине курсан чун савӑнать. Тинех ӑшӑ кунсем ҫитрӗҫ, пылак сӗткен пухаяҫҫӗ вӗсем, - тет Надежда Пирожкова хуҫалӑхӗпе паллаштарнӑ май. Республикипех паллӑ хурт-хӑмӑр ӑстисем утара ҫӗнетсе, пысӑклатса пыраҫҫӗ. 2022-мӗш ҫулта вӗсем "Агростартап" гранта тивӗҫнӗ. 3 миллион тенкӗпе хурт ҫемйисем, пысӑк тиевлӗ машин, пыл юхтармалли тата ытти кирлӗ хатӗр туяннӑ. Пирожковсем патӗнче хӑнасем - ача садне ҫӳрекенсем, шкулта вӗренекенсем - час-часах пулаҫҫӗ. Туристсене те илӗртет хурт-хӑмӑр хуҫалӑхӗ. Уйрӑмах выртса сипленмелли хӑйне евӗр вӗллепе кӑсӑкланаҫҫӗ. Кунта сиплӗ сывлӑш тухса тӑрать иккен. Йӑхран-йӑха куҫса пыракан ӗҫе аталантарсах пырасшӑн Пирожковсем. 

Петр Кошкин та ҫак тӗллевпех 2021-мӗш ҫулта ял хуҫалӑх министерстви ирттерекен конкурса хутшӑннӑ. "Агростартап" грант хуҫи пулса тӑнӑ. - Севок сухан туса илессипе тахҫантанпах ӗҫлетпӗр. Малтан колхоз уйӗнче тӑрӑшнӑ, кайран - килти хуҫалӑхра, - каласа кӑтартать Петр Кошкин. Виҫӗ ҫул каялла ҫӗнӗ шая тухма вӑхӑт ҫитнине ӑнланса илнӗ вӑл. Сухан ӑнса пулнине кура пысӑкрах управӑш, ҫӗнӗ техника кирлӗ пулнӑ. Ҫавӑн чухне патшалӑхран пулӑшу ыйтнӑ та. Грант укҫине плуг, трактор, погрузчик, управӑш валли строительство материалӗсем туянма усӑ курнӑ. Ӑна, сӑмахран, ҫитес ҫул хута ярасшӑн. Пӗлтӗр предприяти 50 тонна яхӑн сухан вӑрлӑхӗ туса илнӗ. "Лук-агро" кооператив йышӗнче пулнӑ май, продукцие вырнаҫтарас тӗлӗшпе йывӑрлӑх ҫук, - тет Петр Кошкин. Фермер патӗнче 2 механизатор тӑрӑшать. Тухӑҫ пухса кӗртнӗ вӑхӑтра вара 50-60 ҫынна ӗҫе илет. 

2019-мӗш ҫултанпа "Агростартап" программӑпа килӗшӳллӗн Чӑваш Енри фермерсене 410 миллион тенкӗлӗх тӗрев панӑ. Кӑҫал тата 35 ҫын ҫак гранта тивӗҫме пултарать. Сӑмах май, унӑн виҫине ӳстернӗ. 

Заявкӑсене ҫӗртме уйӑхӗн 2-мӗшччен йышӑнаҫҫӗ. 

Екатерина Фомина, Степан Гурьянов, Вадим Владимиров