Тухӑҫа вӑхӑтра, тӑкаксӑр пухса кӗртме васкаҫҫӗ хуҫалӑхсем. Гектартан вӑтамран 30 центнер тухать. Хӑш-пӗр хуҫалӑхсем ытларах та пухса кӗртеҫҫӗ. Сӑмахран, ҫак ана ҫинчен 40 центнертан кая мар илмелле. Кунта Сергей Волков фермер элита вӑрлӑх акса хӑварнӑ, - каласа кӑтартать район администрацийӗн ял хуҫалӑх пайӗн пуҫлӑхӗ Анатолий Прохоров. Хӑватлӑ техника ӗҫ тухӑҫлӑхне самай ӳстерет. Ҫанталӑк ура хумасан вырма кал-кал иртессе шанатпӑр, теҫҫӗ ҫӗр ӗҫченӗсем. Выльӑх апатне те вӑхӑтра хатӗрлесе хӑварма васкамалла. Хӗл хырӑмӗ аслӑ - утӑ, сенаж, силос сахал мар кирлӗ. Ҫав вӑхӑтрах хуҫалӑхсем кӗрхи культурӑсене акма ҫӗр хатӗрлеҫҫӗ. Элӗк районӗнче вӗсен лаптӑкӗ 4 пин гектара яхӑн пулмалла.
Екатерина Фомина, Михаил Солин
