Ял хуҫалӑх министрӗ Сергей Артамонов палӑртнӑ тӑрӑх, ҫуркунне кӑҫал нихҫанхинчен ир килчӗ. Хуҫалӑхсем хире пуш уйӑхӗн 20-мӗшӗнчех тухнӑ, пӗлтӗр вара кӗрхисене ака уйӑхӗн 12-мӗшӗнче апатлантарма тытӑннӑ. Калча тӗпрен илсен лайӑх хӗл каҫнӑ. Вӑрлӑх ҫителӗклӗ хатӗрленӗ, кирлинчен 5 процент ытларах та. Кондицие ларни - 93 процент. Вӑрлӑха тасатас ӗҫ халӗ малалла пырать.
Кӑҫал акакан лаптӑк Чӑваш Енре 550 пин ытла гектарпа танлашӗ. Уй-хир ӗҫне кӗске вӑхӑтра тата пахалӑхлӑ ирттернипе пӗрлех усӑ курман ҫӗрсене пусӑ ҫаврӑнӑшне кӗртес тӗлӗшпе те тӑрӑшмаллине каларӗҫ канашлура. Республикӑра унашкал 27 пин ытла гектар лаптӑка шута илнӗ. Ӑна 2025-мӗш ҫул вӗҫлениччен пусӑ ҫаврӑнӑшне кӗртсе пӗтерме палӑртнӑ Ял хуҫалӑх министерствинче. Кӑҫалхи тӗллев - 10 пин ытла гектар.
Екатерина Фомина, Виктор Степанов
