Чӑваш телевиденийӗ паян республикӑри тӗп массӑллӑ информаци хатӗрӗсенчен пӗри. Чӑваш Енре пурӑнакансене кашни кунах чи пӗлтерӗшлӗ хыпарсемпе паллаштарса тӑрать. Унсӑр пуҫне вуншар передача куракан патне ҫитет. Кӑларӑмсем яланхи пекех "Россия 1" тата "Россия 24" телеканалсемпе икӗ чӗлхепе тата тӳрӗ эфирта тухса тӑраҫҫӗ. Ҫавӑнпа та вӗсен пахалӑхӗшӗн пысӑк ушкӑн яваплӑ. Телекурав тытӑмӗнче халӗ 120-е яхӑн ҫын ӗҫлет. Кашниех пӗр-пӗринпе тачӑ ҫыхӑнура пулса хӑйӗн тивӗҫне пурнӑҫлать. Ҫӗнӗ самана вара пире ҫӗнӗлле ӗҫлеме хистет, ҫавӑнпа хыпарлав йӗрки те улшӑнсах тӑрать.
Телекурав 63 ҫул тултарчӗ пулсан, "Чӑваш радио" вара 98 ҫула ҫитрӗ. Куллен ирхи 6-ран пуҫласа каҫхи 19 сехетчен "Радио России" "Маяк" тата "Вести FM" хумӗсем ҫинче тухать вӑл. Редакцире 20 ҫын тӑрӑшать. Кашни кунах вӗсем чӑвашла тата вырӑсла 8 кӑларӑм хатӗрлеҫҫӗ. Кун каҫа 3 сехет те 20 минут чухлӗ эфир вӑхӑтне тултараҫҫӗ. Пӗтӗмпе вара тӗрлӗ темӑллӑ 60 кӑларӑм йӗркелесе пыраҫҫӗ. Ытларах чухне тӳрӗ эфирта ӗҫлеҫҫӗ.
Телерадиокомпанире хӑйсен ӗҫне юратса тӳрӗ кӑмӑлтан пурнӑҫлакан чӑн-чӑн специалистсем тӑрӑшаҫҫӗ. Хӑвӑрт улшӑнакан тӗнчере журналистикӑпа хыпарлав ӗҫӗнчи ҫӗнӗлӗхсене алла илеҫҫӗ. Хамӑр кураканпа яланах ҫывӑх пулас тесе интернет тытӑмӗнче те хастар пулма тивет пирӗн. Ҫавӑнпа та хыпарсемпе ытти кӑларӑмсене социаллӑ тетелте те ҫутатса тӑратпӑр. Кун-ҫул уттинчен юлмасӑр хальхи вӑхӑт ыйтнине туллин тивӗҫтерме тӑрӑшатпӑр.
Алексей Енейкин, Андрей Шоклев
