«Хуртан вар" текен уҫланка ӗлӗкхиллех йышлӑ халӑх пуҫтарӑннӑ. Ӗмӗртен ҫирӗпленнӗ йӗркепе вӑйӑ картине тӑрса ҫаврӑнчӗҫ, ваттисен йӑлине пӑхӑнса уяв хӑнисене ҫавра ҫӑкӑрпа, килте тунӑ сӑрапа сӑйларӗҫ.12 ҫул пухӑнман ҫапла - йӳҫкассисем пӗрлехи уявшӑн тунсӑхланӑ. Кӑҫалтан вӑл округра пурӑнакан мӗнпур хресченпе культура ӗҫченӗсемшӗн "Сурӑм ҫӑлтӑрӗсем" пӗрремӗш фестиваль пулса тӑчӗ. "Ударник" совхоза 1981-мӗш ҫултан тытӑнса 2012-мӗш ҫулччен ертсе пынӑ, ӑна ҫӗршыв пӗлмелӗх ҫӗкленӗ Платон Павлович Давыдов пирӗншӗн савӑнса тӑтӑр", - терӗҫ тухса калаҫакансем.
Округ пуҫлӑхӗ Александр Давыдова Чӑваш Республикин культура министерствин Хисеп хутне пачӗ, ҫавӑн пекех ӗҫре палӑрнӑ ытти хастарсене чысларӗ. Фестивальте Муркаш тӑрӑхӗнчи юрӑ-ташӑ ансамблӗсем хӑйсен пултарулӑхне пур енлӗн кӑтартрӗҫ. Аслӑ ӑрурисем хӑйсен ӗҫне кӗҫӗннисене вӗрентсе пыни паха. Фольклор ушкӑнӗсенче - ватти-вӗтти пӗрле. Сӑмахран, аслӑ классенче вӗренекен каччӑсем салтака ӑсатас йӑлапа паллаштарчӗҫ. Паян ҫӗршыва ҫӑмӑл мар, ентешсем ятарлӑ ҫар операцийӗнче тӑшманпа кӗрешеҫҫӗ. Вырӑнти чиркӳ пачӑшки хамӑрӑн салтаксемшӗн кӗлӗ туни ҫинчен пӗлтерчӗ.
Раҫҫейре Ҫемье ҫулталӑкӗ пулнӑ май, чылай ҫул пӗр-пӗринпе килӗштерсе пурӑннӑ мӑшӑрсене ҫамрӑксемшӗн тӗслӗх вырӑнне хурса чысларӗҫ. Еленӑпа Николай Сергеевсем, Марияпа Пётр Степановсем 50 ҫул, Риммӑпа Зиновий Степановсем 55 ҫул пӗр чӗлле ҫурмалла пайлаҫҫӗ. Иртнисӗр малашлӑх ҫуккине асра тытакан йӳҫкассисемшӗн аслӑ ӑру усӑ курнӑ кашни япала хаклӑ. Асатте-асаннесен ал ӑшшине упракан хатӗр-хӗтӗр - уйрӑм куравра. Ял историйӗпе сӑн ӳкерчӗксенче те паллашма пулчӗ. "Ку уяв - пирӗн атте-анне савӑннӑ уяв, вӑл малашне пирӗн мӑнуксене хамӑр йӑласене астуса пурӑнма май паракан фестиваль пултӑрччӗ", - тет Чӑваш наци конгресӗн вице-президенчӗ Павел Вязов.
Спорт ӑмӑртӑвӗсемсӗр хальччен кунта пӗр уяв та иртмен. "Сурӑм ҫӑлтӑрӗсем" фестивале пуҫтарӑннисем те спортӑн тӗрлӗ енӗпе вӑй виҫрӗҫ.
Ахальтен мар "Сурӑм ҫӑлтӑрӗсем" тесе ят панӑ фестивальте муркашсем тӑван халӑх культурипе ӳнерӗшӗн ҫӗнӗ ятсем, ҫутӑ ҫӑлтӑрсем ҫитӗнтерес тӗллев лартни те куҫкӗрет.
Марина Карягина, Иван Макеев
