Пуҫтарӑннисем малтанах техникусемпе колледжсем салтаксем валли хатӗрлекен япаласен куравӗпе паллашрӗҫ. Студентсем пушӑ вӑхӑтра хӳтӗлев каррисем, алсиш-носки ҫыхаҫҫӗ, окоп ҫуртисем тӑваҫҫӗ, апат-ҫимӗҫ пӗҫереҫҫӗ, ӑшӑ кофтӑсемпе балаклавӑсем ҫӗлеҫҫӗ, ҫырусем ҫыраҫҫӗ тата ытти те. Шупашкарти электромеханика колледжӗнче сварщик профессине алла илекенсем вӗрентекенсен пулӑшӑвӗпе 15 кӑмака ӑсталанӑ. Ытти техникумсем те ку енӗпе хастар. Мӗн вӑй ҫитнӗ таран пулӑшма тӑрӑшаҫҫӗ салтаксене.
Улатӑрти технологи колледжӗнче ятарлӑ ҫар операцийӗ пуҫлансанах типӗ душ хатӗрлеме пикеннӗ. Паянхи куна пурӗ 5 пине яхӑн хутаҫ пуҫтарнӑ. Вӑл шутра кӑҫалхи вӗренӳ ҫулӗ пуҫланнӑранпа - 500. Шупашкарти апат-ҫимӗҫ технологийӗпе коммерци техникумӗнче ӑс пухакансем вара типӗ яшка хатӗрлеҫҫӗ, варенисем вӗретсе хупаҫҫӗ. Кашни студент ҫапӑҫу хирӗнчи ентешсене пулӑшас ӗҫе тӳпине хывма тӑрӑшать.
Пухӑннисене Вӗренӳ министрӗ Дмитрий Захаров, республикӑри хӗрарӑмсен пӗрлешӗвӗн ертӳҫи Наталья Николаева саламларӗҫ. "Ҫавра сӗтел" вӑхӑтӗнче вӑтам професси пӗлӗвӗ паракан учрежденисен ырӑ ӗҫне республикӑри ытти фондсем урлӑ тӗллевлӗ йӗркелеме пулнине палӑртрӗҫ. Ҫакӑ вӗренекенсемпе студентсем кӳрекен пулӑшу витӗмне тата анлӑлатма май парӗ.
Оксана Верликова, Вадим Владимиров
