Шуршӑл ҫӗрӗ хӑнасене яланах тарават. Андриян Николаевӑн 95 ҫулне халалланӑ чаплӑ уява летчик-космонавт ячӗллӗ мемориал комплексӗнче халӑх ирех пухӑнчӗ. Пурте хавхаланса сумлӑ ентешне аса илеҫҫӗ.
Андриян Николаев Гагаринпа Титов хыҫҫӑн космоса вӗҫнӗ 3-мӗш ҫын пулнипе кӑна мар, уҫлӑхра унччен никам туман рекордсем кӑтартнипе те паллӑ. Малтанхи вӗҫевре вӑл 4 талӑк ирттерсе ҫӗр чӑмӑрӗ тавра 64 хут ҫаврӑннӑ. Космос карапӗнче скафандр хывса тата ларкӑч ҫумӗнчи пиҫиххине вӗҫертсе ирӗклӗ вӗҫеве туйса курнӑ 1-мӗш ҫын та вӑлах. Ҫавӑн пекех Андриян Григорьевич пуҫласа икӗ карап хушшинчи радиоҫыхӑнӑва тухнӑ, хӑй тӗллӗнех вӗҫев йӗркеленӗ. 1970-мӗш ҫулта иккӗмӗш хут космоса ҫӗкленсен уҫлӑхра 18 талӑк пулса черетлӗ рекордсем кӑтартнӑ. Хӑюлӑхпа паттӑрлӑхшӑн икӗ хут Совет союзӗн геройӗ ята тивӗҫнӗскер тӑван тӑрӑхне таврӑнсан яланах халӑхпа пӗр тан калаҫнӑ.
Уяв халӑхне Чӑваш Ен Пуҫлӑхӗ Олег Николаев, Патшалӑх Канашӗн председателӗ Леонид Черкесов, Сергей Авдеев космонавт тата Андриян Николаевпа Валентина Терешкован хӗрӗ Елена Андрияновна ӑшшӑн саламларӗҫ. Елена Терешкова ашшӗне яланах асра тытса унӑн ырӑ ячӗпе хӗпӗртесе пурӑннӑшӑн мӗнпур чӑваш халӑхне чӗререн тав турӗ. Хисеплӗ хӑнасем асану комплексӗн пахчинче асра юлмалӑх улмуҫҫи лартрӗҫ. Ҫак ӗҫе Елена Андрияновнан ҫемйи те хутшӑнчӗ. Ҫитес ҫулсенче ҫак сӑваплӑ вырӑн тата та илемленмелле. Космонавтика музейне пысӑк реконструкци кӗтет. Вӑл самай пысӑкланса хӑтлӑлансан хальхинчен темиҫе хут та ытларах ҫынна йышӑнма пултарӗ. Пухӑннисем вара Андриян Николаева мӗн-пур ырришӗн тав туса унӑн вил тӑприйӗ умне чечексем хучӗҫ. Пултаруллӑ артистсем ял-йыша концерт парнелерӗҫ. Сцена ҫинче сумлӑ ентеше халалланӑ ҫӗнӗ юрӑ та янӑрарӗ.
Чӑвашсем пирки пӗтӗм тенчене пӗлтернӗ Андриян Николаев пирӗн халӑхшӑн яланах ҫул кӑтартакан ҫутӑ ҫӑлтӑр вырӑнӗнче пулӗ.
Алексей Енейкин, Андрей Шоклев
