Вӗренӳпе культура, ял хуҫалӑхӗпе промышленнӑҫ, сывлӑх сыхлавӗ, ҫар тата ытти тытӑмра ӗҫлесе тивӗҫлӗ канӑва тухнӑ хисеплӗ ветерансем киленсех Gравительство ҫурчӗпе паллашаҫҫӗ. Тӗллевлӗ экскурсие вӗсем ятарласа Елчӗк тӑрӑхӗнчен килнӗ. Вӗсене ҫапла парне тӑвас шухӑша Патшалӑх Канашӗн депутачӗ Юрий Попов ырласа йышӑннӑ, ентешӗсене савӑнтарма шутланӑ.
Елчӗксен савӑнса хӗпӗртемелли пурах. Патшалӑх Канашне чылай вӑхӑт умлӑ-хыҫлӑн виҫӗ Елчӗк ҫынни ертсе пынӑ. Вӗсем: Михаил Михайловский, Юрий Попов тата Валерий Филимонов. 30 ҫул тултаракан парламентри ӗҫӗпе паллашнӑ май ветерансен Канашӗн хастарӗсем патшалӑх ҫурчӗн ҫӳлти хутне те ҫитрӗҫ. Кунта яланах ятлӑ-сумлӑ ҫынсене чыслаҫҫӗ, пӗлтерӗшлӗ тӗлпулусене йӗркелеҫҫӗ. Купол айӗнчи хӑтлӑ залра елчӗксемпе Чӑваш Ен Пуҫлӑхӗ Олег Николаев та тӗл пулчӗ. Кашни ветерана ӑшшӑн алӑ тытса тухрӗ, вӗсен пурнӑҫӗпе кӑсӑкланчӗ.
Тӗлпулура елчӗксем уйрӑмах ял хуҫалӑх ӗҫӗнче пысӑк ҫитӗнӳсем тунине палӑртрӗҫ. Кунта вара патшалӑх пулӑшӑвӗсӗр ӗҫлеме йывӑр.
Кунтах тепӗр тӗлӗнмелле ӑшӑ тӗлпулу пулса иртрӗ. Елчӗкрен ҫитнӗ ветерансен йышӗнче Олег Алекссевичпа пӗр ялта ҫуралса ӳснӗ ҫын та пулчӗ.
Чӑваш Ен Пуҫлӑхӗ хисеплӗ хӑнасемпе пӗрле тӑрса асра юлмалӑх сӑнӳкерчӗк турӗ. Ветерансене вара патшалӑх ҫурчӗн тавралла ҫаврӑнакан анлӑ балконӗ ҫинчен хула илемне кӑтартрӗҫ.
Елчӗк тӑрӑхӗнчи ветерансен Канашӗн пайташӗсем саккун кӑларакансен ӗҫӗпе кӑсӑкланса канашлу залӗнче ятарлӑ лару ирттерчӗҫ.
Хастар пенсионерсемпе Аппарат ертӳҫи Вячеслав Трофимов, аграри тата экологи ыйтӑвӗсемпе ӗҫлекен комитет ертӳҫи Алексей Шурчанов, ачасен правине хӳтӗлекен уполномоченнӑй Алевтина Федорова, Елчӗк тӑрӑхӗн пуҫлӑхӗ Леонард Левый тата ветерансем сӑмах илчӗҫ. Патшалӑх Канашӗн пархатарлӑ ӗҫӗсене палӑртса ялта та пурнӑҫ ҫӑмӑлланса пынине каларӗҫ. Ертӳҫӗсем ҫак ҫитӗнӳре ваттисен тивӗҫне палӑртрӗҫ.
Пухӑннисем пӗр-пӗрин ҫитӗнӗвӗсемпе хӗпӗртесе Патшалӑх Канашне малашне те тухӑҫлӑ ӗҫлесе пыма ӑнӑҫу сунчӗҫ.
Алексей Енейкин
