Пысӑках мар ялта пӗр ҫемьери пек туслӑн пурӑнакансем пурте тенӗ пек ялти клуб тӗлӗнчи митинга пухӑнчӗҫ. Ҫӗнтерӳ кунӗ умӗн Юпшик Ялтӑрана ҫитнӗ хыпар халӑха хумхантарчӗ те, савӑнтарчӗ те.
Михаил Игнатьев 5 ачаллӑ килте кӗҫӗнни пулнӑ. Вӑрҫӑ тухнӑ вӑхӑтра аппӑшӗсем ҫемьеленнӗ те ӗнтӗ. Аслӑ пиччӗшӗ Иван фронтра хыпарсӑр ҫухалнӑ, вӑтамми Николай 1946-мӗшӗнче тӑван яла тӗрӗс-тӗкел таврӑннӑ. Кӗҫӗннин Михаил Игнатьевичӑн кун-ҫулӗ синкерлӗн вӗҫленнӗ.
Ҫулсеренех 1941-мӗшӗнче тухнӑ хӑрушӑ вӑрҫӑра хыпарсӑр ҫухалнӑ совет салтакӗсене шыракан волонтерсем тӗлне пулнӑ чӑваш ачи. Унӑн кӗлеткин юлашкисене, ҫумӗнчи документ татӑкӗсене Мускаври "Центр" отряд хастарӗсем тупса тӗпченӗ.
19 ҫулта вӑрҫа тухса кайнӑ Михаил Игнатьева тӑван ҫӗре "Веда" шырав отрячӗ илсе килнӗ. Сӑмах май, халӗ пирӗн шыравҫӑсем Волгоград облаҫӗнчи Самохваловка ҫывӑхне тӗпчеҫҫӗ. Хальлӗхе 5 салтака тупнӑ, вӗсен ятне-шывне, хӑш тӑрӑхран пулнине палӑртассипе ӗҫлеҫҫӗ.
Михаил Игнатьева юлашки ҫула ӑсатма республикӑри ҫар комиссарӗ Бахтиёр Холиков, вырӑнти ертӳҫӗсем, йӗрке хуралҫисем, ял халӑхӗ хутшӑнчӗ. Ҫӗршыв хӳтӗлевҫине оркестр кӗввипе, 3 хут пӑшал персе хисеп туса пытарчӗҫ.
Юпшикялтӑрасен паттӑр ывӑлӗ нумай ҫул иртсен тӑванӗсем ҫумӗнче ӗмӗрлӗх канлӗх тупрӗ.
Алиса Александрова, Екатерина Янгалакова
