Унччен "Чӑваш бройлерӗ" пулнӑ чӑх-чӗп фабрики ҫӗнӗрен ӗҫлеме пуҫланӑ

Пӗлтӗр предприятире ҫулталӑкне 1 миллион та 600 пин ҫӑмартаран чӗп кӑлармалли инкубатор ӗҫлеттерсе янӑ. Проект хакӗ 36 миллион тенке яхӑн. Иртнӗ 3 уйӑхра шкафсене 4 хут 36 пиншер ҫӑмарта хунӑ. Юлашки партирен чӗпсем ака уйӑхӗн пуҫламӑшӗнче тухмалла.

Инкубаторта кирлӗ условисене пӗтӗмпех ятарлӑ программа асӑрхаса тӑрать. Тухнӑ чӗпсене вара витӗне куҫараҫҫӗ. Паян ҫакнашкал 4 уйрӑм. Кашнине 35 пин чӑх чӗппи вырнаҫать. Ҫак сар чӑмаккасем, сӑмахран, 12 кунта.

Кӑҫал фабрикӑра чӑх-чӗп пусмалли тата аш-какай тирпейлемелли цех хута янӑ. Ҫавӑн пекех 150 тонна продукци упрамалли холодильник вырнаҫтарнӑ. Пӗтӗмӗшле проект хакӗ - 250 миллион тенкӗ. Ҫапла ҫулталӑкне 2 пин тонна аш-какай туса илесшӗн. Паян фабрикӑра 20 тӗрлӗ продукци хатӗрлеҫҫӗ. Ҫитес вӑхӑтра вӗсем лавкка сентрисем ҫинче пулаҫҫӗ. Апта-ҫимӗҫ экологи тӗлӗшӗнчен таса тесе шантараҫҫӗ. Предприятин хӑйӗн комбикорм линийӗ ӗҫлет, каяшсене тасатмалли сооружени те пур. Ҫӗнӗ цех хута яни  тепӗр 50 ӗҫ вырӑнӗ йӗркелеме май панӑ. Предприятине патшалӑх та пулӑшать. Тӗрлӗ хатӗр туяннипе ҫыхӑннӑ тӑкаксен 30 процентне саплаштараҫҫӗ, ҫӑмӑллӑхлӑ кредитсем те уйӑраҫҫӗ.

Диана Иванова, Виктор Степанов