Ҫуркуннене кӗтсе илекен савӑнӑҫлӑ уяв ку тӑрӑхра пурӑнакан тӗрлӗ халӑх ывӑл-хӗрне пӗр кӗрекере пухать. Хӑнасем пӗр-пӗрин культурипе паллашса хӑйсен йӑли-йӗркин пуянлӑхне кӑтартаҫҫӗ. Кунта: Иран, Таджикистан, Азербайджан, Кӑркӑсстан, Казахстан тата ытти ҫӗршыв халӑхӗ савӑнать.
Кунпа ҫӗр танлашнине палӑртса Навруз авалхи хӗвел календарӗпе Ҫӗнӗ ҫул пуҫланнине пӗлтерет. Тухӑҫпа вӑтам Ази халӑхӗсем ӑна яланхиллех анлӑ уявлаҫҫӗ. Ҫак йӑла кӳршӗллӗ Тутарстанра та упранса юлнӑ. Пирӗн вара манӑҫа тухнӑ тесен те юрать. Авалхи несӗлсем Навруза яланах паллӑ тунӑ.
Хӗвеллӗ кун тӑршшӗ вӑрӑмланма пуҫланнӑ чух ҫӗнӗ пурнӑҫ, ҫӗнӗ ӗмӗтпе ҫитӗнӳсем кӗтсе тӗрӗк халӑхӗсем яланах сӗтел ҫине шӑтарса калчалантарма пуҫланӑ тулӑ лартнӑ. Кашни апат-ҫимӗҫӗн хӑйӗн пӗлтерӗшӗ. Ҫак тата ытти пуянлӑхпа паллашнӑ хыҫҫӑн уяв халӑхӗ концертра савӑнчӗ.
Алексей Енейкин, Екатерина Янгалакова
