Ку тӑрӑхра пурӑнакансем ҫак лаптӑка тирпей-илем кӗртессине тахҫантанпах кӗтнӗ. Вӗсем маларах ку ыйтупа Раҫҫей Патшалӑх Думин депутачӗ Алла Салаева патне йышӑнӑва пынӑ. Эрне каялла рабочисем ӗҫе пуҫӑннӑ. Проект тӑрӑх кунта ачасем вылямалли темиҫе лаптӑк пулать. Унта чуччусем, тӑвайккисем вырнаҫтараҫҫӗ.
Ҫуран ҫӳремелли ҫулсене ҫӗнетнӗ те ӗнтӗ. Ҫавӑн пекех саксем вырнаҫтарӗҫ, ҫутӑпа тата видеосӑнавпа тивӗҫтерӗҫ. Ку вырӑнта тахҫан сцена та пулнӑ. Унта тӗрлӗ уяв йӗркеленӗ. Кунта пурӑнакансем ыйтнипе киввине пӑсса ҫӗнӗ сцена тума пуҫланӑ.
Графикпе килӗшӳллӗн объекта чӳк уйӑхӗн вӗҫӗнче хута ямалла. Подрядчик вара ӗҫе маларах туса пӗтерме шантарать. Афанасьев урамӗнчи 9-мӗш ҫурт лаптӑкӗ пысӑк. Юнашарах 2-мӗш шкул, сатик вырнаҫнӑ. Ҫавӑнпа та ку вырӑна тирпейлени питӗ пӗлтерӗшлӗ.
Сӑмах май, 2-мӗш шкул таврашне те хӑтлӑх кӳреҫҫӗ. Кунта ҫӗнӗ спорт лапамӗ тӑваҫҫӗ. Ӗҫсем вӗҫленнӗпе пӗрех. Алла Салаева улшӑнусемпе кӑмӑллӑ юлчӗ, ача-пӑча лаптӑкӗ уҫӑласса та кӗтетпӗр, терӗ Патшалӑх Думин депутачӗ.
Диана Иванова, Михаил Солин
