Матрёшка паха парне шутланать. Тӗп хула ҫуралнӑ кунӗ тӗлне те пысӑк пуканесем вырӑнлӑ пулӗҫ. Ҫак шухӑш Ксения Кокель тата Дмитрий Егоров ҫамрӑк ӳнерҫӗсен ҫуралнӑ. Вӗсем тӑтӑшӑх ҫул ҫӳревре пулаҫҫӗ, тӗрлӗ фестивале хутшӑнаҫҫӗ, нумай ҫӗнни кураҫҫӗ. Ҫапла тӑван хулара та илӗртекен лаптӑк тӑвас тенӗ. Художниксен ӗҫӗсене шупашкарсем пӗлеҫҫӗ ӗнтӗ. Ксения - "Каскад" суту-илӳ центрӗ патӗнчи Нарспи ӳкерчӗкӗн авторӗ, Дмитрий троллейбуса сӑрласа илемлетнӗччӗ. Унсӑр пуҫне иккӗшӗ вӗсем Мускав ҫыранлӑхӗнчи пӗр стенана капӑрлатнӑ. Хула администрацийӗ хальхинче те ҫамрӑксен шухӑшне ырласа йышӑннӑ, чи лайӑх лаптӑк уйӑрса панӑ, пур хатӗрпе тивӗҫтернӗ.
Тӳрӗ стена ҫинче ӳкернинчен кунта паллах, уйрӑмлӑхсем пур, теҫҫӗ художниксем. Пӗчӗк пай нумай. Хӑпарса анмалли хатӗре те тӑтӑшх куҫармалла. Ҫакӑ пӗтӗмпех вӑхӑта тытать. Эскизсен авторӗ - Яна Иванова. Пуканесем тӗрлӗ чӑваш ҫи-пуҫӗпе пулӗҫ.
Ӗҫе вӗҫлесен капмар пуканесем тата та илӗртӳллӗрех пулӗҫ. Кӳлепесене ҫиелтен ятарлӑ лакпа витӗҫ. Ҫакӑ янкӑр сӑрӑсене ҫумӑрпа хӗвелтен ҫийӗнсе пӗтесрен сыхлӗ. Матрёшкӑсем, паллах, вӑрттӑнлӑхсӑр - шалта пӗчӗкреххисем ҫук. Унсӑррӑн та кунта яланах ҫын йышлӑ пуласса шанма пулать. Художниксен ӗҫе ҫӗртме уйӑхӗн 1-мӗшӗ тӗлне вӗҫлемелле.
Диана Иванова, Наталия Егорова, Димитрий Макаров
