Уяв тӗлне ӳнер шкулне ҫӳрекенсенсем тата ашшӗ-амӑшӗ илемлӗ концерт хатӗрленӗ. Уйрӑмах ҫемье ушкӑнӗсем куракансене савӑнтарчӗҫ. "Гармония" дуэт - хӗрӗпе амӑшӗ - Анастасияпа Ирина Алексеевасем асамлӑ чечек пирки юрӑ шӑрантарчӗҫ. Георгийпа Леонид Гореловсем фортепианопа "Йытӑ вальсӗ" каларӗҫ. Евгения Васютина ҫак шкула 2013-мӗш ҫулта пӗтернӗ, халӗ хӑйӗн пултарулӑхне Чӑваш патшалӑх университечӗн искусство факультетӗнче туптать. Ҫав вӑхӑтрах Чӑваш патшалӑх академи симфони капеллинче ӗҫлет. Вӑл концертра Бахӑн "Шутка" хайлавне флейтӑпа каларӗ.
Ульяна Чернова вара пурне те"Эпир ҫемье" юрӑ парнелерӗ. Хӗр ача ӳнер шкулне 4-мӗш ҫул ҫӳрет. Хӗрачан ҫитӗнӗвӗсене кура ку шкула аппӑшӗпе шӑллӗ те ҫӳреме пуҫланӑ.
Ҫак кун "Ҫемье вернисажӗ" курава та пӗтӗмлетрӗҫ. Унта ачасемпе ашшӗ-амӑшӗ ӑсталанӑ ӗҫсене тӑратнӑ. Вӗсене мӗнрен тунине тӳрех ӑнланма та йывӑр - пурте кӑсӑклӑ та илемлӗ. Курава хутшӑнакансене тав ҫырӑвӗсемпе чысларӗҫ. Сӑмах май, ӳнер академинче паянхи куна 800 ытла ача вӗренет. Вӗсем пултарулӑхне юрӑ-ташӑ, ӳнер татат дизайн енӗпе аталантараҫҫӗ.
Надежда Александрова, Виктор Степанов
