"Ялта чи лайӑххисем" слет чатӑр лагерӗ евӗр иртрӗ. Хастарсен пӗр кунлӑх хӑтлӑх пирки манма тиврӗ. Апатне те кӑвайт ҫинче хӑйсемех пӗҫереҫҫӗ - кам шаркку, кам яшка. Чылӑйӑшне ҫут ҫанталӑка ҫывӑх пулни килӗшет те. Тӑвай тӑрӑхӗнчи ҫырма-ҫатраллӑ вырӑнсем хӑйсен илемӗпе тыткӑнлаҫҫӗ. Тепӗр паха самант - ҫӗнӗ туссем тупни.
Ял аталанӑвӗшӗн ҫунакан ҫамрӑксене Тӑвай тӑрӑхӗнче 3-мӗш ҫул пуҫтараҫҫӗ. Программа яланхи пекех кӑсӑклӑ та анлӑ. Спорт пайӗ кӑна мӗне тӑрать. Кӑҫал ҫӗнӗ ӑмӑрту программӑна кӗртнӗ - квадроциклсемпе ҫӳресси. Спартакиада пӗтӗмлетӗвӗ тӑрӑх чи маттур ҫамрӑксем Тӑвай тӑрӑхӗнче пурӑнни палӑрчӗ. Ытти муниципалитетсен ҫитӗнӗвӗсемпе хӑйнееверлӗ курав паллаштарчӗ. Кашни округ экологипие ҫыхӑннӑ стенд йӗркеленӗ. Красноармейскисем, тӗслӗхрен, бассейн туса пулӑ янӑ. Малашне муниципалитетра осетр ӗрчетесшӗн.
Ӑнӑҫлӑ ӗҫлекен предприяти ертӳҫисем ҫамрӑксене Чӑваш Енри агротуризм аталанӑвӗ пирки каласа кӑтартрӗҫ. Канаш тӑрӑхӗнчи "Мелилотус" хуҫалӑх пӗлтӗр 3 пине яхӑн туриста йышӑннӑ, чей хатӗрлес вӑрттӑнлӑхсене уҫӑмлатнӑ. Тӗл пулусене тӗрлӗ эксперта чӗннӗ. Ҫемье хаклӑхӗсене пырса тивекен ыйтусене те хускатрӗҫ. Аудиторие икӗ пая пайларӗҫ - пӗрисем ҫемьешӗн, теприсем ҫак шухӑша хирӗҫ пулчӗҫ. Тавлашуллӑ самантсене вӑйӑ евӗр сӳтсе яврӗҫ.
"Ялта чи лайӑххисем" форума кӑҫал пин те пилӗкҫӗр хастар хутшӑннӑ - ҫамрӑк педагогсем, тухтӑрсем, культура ӗҫченӗсем. Влаҫрисене те усӑллӑ калаҫусене явӑҫтарчӗҫ - йышӑннӑ ыйтусене кӗске вӑхӑтра пурнӑҫа кӗртме.
Ҫамрӑксене ял пурнӑҫне явӑҫтарасси пирки калаҫнипе ҫеҫ ҫырлахмалла мар, ӗҫпе тата ҫитӗнӳсемпе кӑтартмалла, терӗ Республика Пуҫлӑхӗ. Ҫитес ҫул агрослета тата та анлӑрах йӗркелесе ытти регионти хастарсене йыхравласшӑн.
Вероника Павлова, Екатерина Янгалакова
