Муркаш тӑрӑхӗнчи Ильинка ҫывӑхӗнче ӳсекен юман пӗлтӗр пӗтӗм ҫӗршыври конкурсра ҫӗнтернӗ. 69 йывӑҫ хушшинче мала тухнӑскер тӳлевсӗр тӗрӗслев сертификатне тивӗҫнӗ. Ҫавна май Мускавран ятарласа специалистсем килнӗ. Вӗсем юман тӑррине, типӗ туратсене касса тикӗслеҫҫӗ, вуллин шалти пайне тишкереҫҫӗ. Ҫавӑн пекех йывӑҫ тымарӗсене апатлантарӗҫ, таврари ҫӗре кислородпа пуянлатӗҫ. Унсӑр пуҫне юман мӗн чухлӗ ҫӗрнине те тимлӗх уйӑрӗҫ. Кун пек тӗплӗ тӗпчев юлашки хут 10 ҫул каялла тунӑ.
Ку юман республикӑра чи асли шутланать. 372 ҫулхи йывӑҫ ҫӳллӗшӗ - 20 метр, вуллин сарлакӑшӗ - 182 сантиметр. Ҫут ҫанталӑк палӑкӗ умӗнче шкулти лесничествӑсемпе вӗрентекенсем те пуҫтарӑнчӗҫ. Вӗсем йывӑҫ йӗри-тавра тасатрӗҫ, ҫӳп-ҫапа, типӗ туратсене пуҫтарчӗҫ. Юман патне килекенсем ҫулран ҫул нумайланса пыраҫҫӗ. Ҫавӑнпа та лаптӑк тирпейлӗ те илӗртӳллӗ пулмалла.
Юмана пӑхса тӑни, унӑн сывлӑхне ҫирӗплетни Чӑваш Ене туристсене ытларах явӑҫтарма пулӑшӗ. Сӑмах май, кӑҫал "Раҫҫей ҫулталӑк йывӑҫӗ-2024" ятшӑн Ҫӗмӗрлери Петӗр патша юманӗ тупӑшать. Уншӑн ҫурла уйӑхӗн 1-мӗшчен "росдрево ру" сайтра сасӑлама пулать.
Диана Иванова, Екатерина Янгалакова
