"Станиславский.com" театрта "Снегурочка" ятлӑ ҫӗнӗ спектакль хатӗрленӗ

Спектакльте юрӑ-ташӑ чылай. Актерсем шӑхлич калама та вӗреннӗ. Тӗлӗнтермеллипех тӗлӗнтерес тенӗ куракансене. Александр Островский пьеси тӑрӑх лартнӑ постановка ку театршӑн хӑйнеевӗрлӗ эксперимент. Трагеди жанрӗпе ку таранччен кунта пӗрре те ӗҫлесе курман. Тепӗр кӑсӑклӑ самант: "Юрпикене" эпир Хӗл Мучине пулӑшакан ырӑ сӑнар пек пӗлетпӗр. Кунта вара тӗп героя урӑх енчен кӑтартнӑ. Ҫуркуннепе Хӗл хӗрӗ Лель кӗтӳҫӗн юррисемпе киленсе ҫынсен тӗнчине килет. Унӑн чӗри юрату мӗнне пачах пӗлмен. Анчах та савни унӑн хӗрӳ туйӑмне йышӑнмасть. Чылай терт витӗр тухма тивет тӗп сӑнарӑн. Ҫӗнӗ спектакль - 16 ҫултан аслӑрах куракансем валли. Кун пирки афиша та асӑрхаттарать. Спектакльте чылай ҫӗнӗ артиста курма пулӗ. Снегурочка рольне, тӗслӗхрен, Анастасия Чайкина калӑплать. Купава сӑнарне вара - Валерия Николаева. Вӑл - вӗри чӗреллӗ хӗр. Юратнӑ ҫыншӑн тем те тума хатӗр. Юрпикен унран вӗренмелли ҫеҫ юлӗ.

Репетицисем уҫӑ сывлӑшра - Берендей вӑрманӗнче те иртнӗ. Ольга Савельева режиссер ҫапла майпа сӑнарасен туйӑмне лайӑхрах уҫса пама вӗрентнӗ актерсене. Кунта хӑйнеевӗрлӗ символизм та пур. Островский пьесинче лару-тӑру Берендей патшалӑхӗнче иртет-ҫке. Декорацине хатӗрленӗ чухне вара ку е вӑл саманана сӑнлама тӑрӑшман. Мӗншӗн тесен спектакльте хускатакан ыйтусем пурне те кирек хӑш вӑхӑтра та хумхантарма пултараҫҫӗ.

Вероника Павлова, Михаил Солин