"Шурӑ чулсем" физкультурӑпа сывлӑха ҫирӗплетмелли центрта "Зарница" ҫарпа спорт вӑййисем пуҫланчӗҫ

Ҫар вӑййисем республикӑра пӗр татӑлмасӑр 1968 - мӗш ҫултанпа иртеҫҫӗ. Ҫак йӑла ҫулран-ҫул вӑй илсе кӑна пырать. Чи малтан ӑмӑрту 11-13 ҫулхи ачасене пуҫтарчӗ. Вӗренӳ учрежденине тата ҫамрӑксен ӳсӗмне кура вара эстафета 5 ушкӑнра пулӗ. Старт умӗн Республика Пуҫлӑхӗ Олег Николаев пурне те ӑнӑҫу сунчӗ, вӗренекенсене ҫӗршывшӑн юрӑхлӑ ҫын пулма чӗнсе каларӗ. Унччен маларах командӑсем хӑйсен пултарулӑхне хула-округ шайӗнче кӑтартнӑ. Республикӑри тупӑшусене хутшӑнма кашни дружинӑна 10-шар ача суйласа илнӗ.

"Зарница" программи пуян. Ӑна  "Авангард", "Воин" тата "Движение Первых" ҫарпа патриотика центрӗсем хатӗрленӗ. Унта стройпа утассине, чӑрмавсене парӑнтарассине, медицина пулӑшӑвӗ кӳрессине, ҫан-ҫурӑм ҫирӗплӗхне тӗрӗслессине кӗртнӗ. Ҫамрӑк армеецсем кросс чупаҫҫӗ, турник ҫинче туртӑнаҫҫӗ, тӑршшӗне сикеҫҫӗ тата ытти те. Ачасем ҫавӑн пекех пӑшалтан тӗл перессинче тупӑшаҫҫӗ, ҫӗршыв историне мӗнле пӗлнине кӑтартаҫҫӗ. Ку ӗҫре обществӑлла хастарсем те пулӑшаҫҫӗ.   Ҫарпа спорт вӑййисем ҫӗртме уйӑхӗн 24-мӗшчен пырӗҫ.

Леонид Петров, Вадим Владимиров