Шупашкарта Анталирен те лайӑхрах, тесе шӳтлеҫҫӗ фестивале хутшӑнакан скульпторсем. Вӗсем танлаштарма пултараҫҫӗ. Нумайӑшӗ Турцири курортсенче хӑйӑртан кӳлепесем ӑсталанӑ. Европӑри хуласенче те ӗҫлесе курнӑ. Чӑваш Енре вӗсене ҫанталӑкпа ӑннӑ - ытлашши шӑрӑх та мар, сивӗ те мар. Маҫтӑрсем 10 кун хавхаланса ӗҫленӗ - шӑпах ҫавӑн чухлӗ вӑхӑт кирлӗ пулнӑ кӳлепесене ӑсталама. Екатеринбургри Андрей Кокорин ку фестивальте пӗрремӗш хут. Вӑл Надежда Павлова балеринӑна сӑнланӑ. Композицире Пысӑк театра та курма пулать. Фестивалӗн илемлӗх ертӳҫи Андрей Молоков скульптор та хӑйӑрпа ӗҫлеме вӑхӑт тупнӑ. Вӑл Константин Иванов поэта тата "Нарспи" поэмӑри тӗп сӑнарсене калӑпланӑ.
Ку хутӗнче фестивалӗн йӗркелӳ комитетне усламҫӑсем те кӗнӗ. Вӗсем ку пулӑмран нумаййине кӗтеҫҫӗ. Туристсене илӗртекен хулара ҫакӑн пек фестваль ирттерни питӗ вырӑнлӑ пулнине палӑртаҫҫӗ.
Пирӗн мухтавлӑ ентешсем Раҫҫей историне кӗрсе юлнӑ ытти сумлӑ ҫынсемпе кӳршӗллӗ тӑраҫҫӗ. Юмахри сӑнарсем те хӑйсен вырӑнне тупнӑ. Кунта ачасем валли хӑйӑр купи те хатӗрленӗ - вӗсем те пӗчӗк кӳлепесем тума пултараҫҫӗ. Скульптурӑсемпе халӗ кашни кӑмӑл тӑвакан паллашма пултарать. Курав авӑн уйӑхӗн вӗҫӗчченех ӗҫлӗ.
Надежда Александрова, Наталия Егорова, Виктор Степанов
