Шупашкарти Васильевсем Мускавра иртекен "Это у нас семейное" конкурса кайма хатӗрленеҫҫӗ

Владимирпа Ирина 7 ача ӳстереҫҫӗ. Ывӑл-хӗрне тивӗҫлӗ воспитани пама та, ӗҫре те ӗлкӗрсе пыраҫҫӗ. Аслисене кура ачисем те хастар. Мӑшӑра "Ашшӗ-амӑшӗн мухтавӗ" орден медалӗпе чысланӑ. Пысӑк йыш "Ҫулталӑк ҫемйи-2020" конкурсра "Спортпа туслӑ ҫемье" номинацире ҫӗнтернӗ. Ирина Юрьевна амӑшӗн мухтавӗн "Анне" паллине те тивӗҫнӗ. Тӗрлӗ ӑмӑртӑва хутшӑнакансем халӗ Мускавра иртекен "Это у нас семейное" конкурса кайма хатӗрленеҫҫӗ.

Нумай ачаллӑ ҫемьере кашнин хӑйӗн тивӗҫӗ, чун киленӗҫӗ, юратнӑ ӗҫӗ пур. Кукамӑшӗ Елена Геннадьевна хӑнана килмессерен мӑнукӗсен ҫӗнӗ ҫитӗнӗвӗсемпе паллашса  хӗпӗртет. Васильевсен асли Никон 20-ре, кӗҫенни Толя - 2 ҫулта.

Кӗҫӗннисем хальлӗхе тӗрлӗ ӗҫпе кӑсӑкланаҫҫӗ. Ӳкерме, чупма, выляма кӑмӑллаҫҫӗ. Пуринчен те ытларах вӗсене пысӑк йышпа пӗр-пӗр япалапа аппаланма килӗшет. Пултарулӑх ӗҫӗ вара Васильевсен сахал мар. Ӑмӑртуран ӑмӑртӑва ҫӳренипе пӗрмай шыравра пулма тивет. Кӑсӑкли, халиччен туманни, тӳресене тӗлӗнтерекенни - черетлӗ конкурсран ҫитӗнӳпе таврӑнас тесен ытти хутшӑнакансенчен пӗр утӑм маларах пымалла. Ҫӗршыв шайӗнчи нумай ачаллӑ ҫемьесен тупӑшӑвне тухса каясси тата яваплӑрах. "Это у нас семейное" конкурсӑн инҫет мелпе иртнӗ тапхӑрне хутшӑннӑ чухне те тӗрлӗ хӑнӑхтару туса социаллӑ тытӑма сӑнӳкерчӗксем вырнаҫтармалла пулнӑ. Ҫемьепе куллен тӑрӑшса 30 ытла пункт пурнӑҫланӑ, пысӑк балл пухнӑ. Хӑнасем чӗнсе тараватлӑха кӑтартма та, пӗрле апат пӗҫерме те, пӗр-пӗр ҫӗнӗ ӗҫ хатӗрӗ шутласа тупма та сӗннӗ конкурса хутшӑнакансене. Паллах, кашни ӗҫ-пуҫ ҫемьене пӗрлештерекенни, тата ытларах ҫывӑхлатаканни, пӗр-пӗрне пулӑшма хӑнӑхтараканни.

Васильевсем халӗ ҫемйипех историри пулӑмсене аса илеҫҫӗ, общество пӗлӗвӗн предметне тепӗр хут тӗпчеҫҫӗ, литературӑпа ҫыхӑннӑ ыйтусене шӗкӗлчени те кирлех тесе шутлаҫҫӗ. Кулленхи ӗҫсене те айккине сирсе яма ҫук. Вӗренӳ, хушма пӗлӳ илесси, кружоксем, секцисем. Кил хуҫи арӑмӗ Ирина хулари нумай ачаллӑ хӗрарӑмсен тӗлпулӑвӗсене йӗркелет. Пурне те пӗрле пуҫтараканни вара ашшӗ Владимир йыш пушанса киле таврӑнсан ирттерекен тренировкӑсем.

Васильевсем ҫемйипех каратэпе туслӑ. Ирина пулас мӑшӑрне те кӗрешӳ залӗнчех тӗл пулнӑ. Владимир тренер, каратэ енӗпе Тӗнче чемпионӗ. Мӑшӑрӗн, ачисен пиҫиххи тӗсӗсем те ӑсталӑх шайне ҫирӗплетеҫҫӗ. Ака уйӑхӗнче иртнӗ республикӑри турнира ҫемйипех хутшӑнса кашниех ҫитӗнӳпе таврӑннӑ. Пултаруллӑ ҫын пур ӗҫре те маттур. Васильевсем тӑванӗсене ялти пахчара та, дачӑра та пулӑшаҫҫӗ. Ӗҫпе канӑва шайлаштарассине мала хураҫҫӗ. Ҫывӑх вӑхӑтра вара 3 ӑрӑва - кукамӑшне, ашшӗпе амӑшне, ачисене "Это у нас семейное" конкурсӑн Мускавра ҫу уйӑхӗн 16-мӗшӗнчен 19-мӗшӗччен иртекен ҫурма финалӗнче кӗтеҫҫӗ.

Алиса Александрова, Екатерина Янгалакова