Алексей Филиппов ку библиотекӑна ҫур ӗмӗр ытла ҫӳрет. Ятарлӑ вулавӑшсӑр хӑйӗн пурнӑҫӗ кичем пулӗччӗ, тет вӑл.
Библотека фондӗнче малтан Брайль шрифчӗпе 347 кӗнеке кӑна пулнӑ пулсан, паянхи куна вӗсен шучӗ 200 пин ытла. Куҫ курманнисене информаципе паллашма тӗрлӗ хатӗр пулӑшать. Библиотека компьютер класӗпе те мухтанма пултарать. Ӑна Николай Парахин 14-мӗш ҫул ертсе пырать. Пӗлтӗр ҫак класа ҫӗнетнӗ.
Юбилей тӗлне "Нескучный тур "Чувашия на ощупь"" ҫулҫӳрев кӗнеки кӑларнӑ. Ку проекта Республика Пуҫлахӗн гранчӗпе пурнӑҫланӑ. Кӗнекери материала Брайль шрифчӗпе, пысӑк саспаллисемпе пичетленӗ тата сасӑпа вуласа хатӗрленӗ. Издани республикӑри 23 округпа хулари паллӑ вырӑнсем пирки каласа кӑтартать. Кашни тӑрӑха пӗрер экземпляр ҫитересшӗн ҫывӑх вӑхӑтрах. Кӗнеке суккӑр е япӑх куракансемшӗн усӑллӑ та кӑсӑклӑ пулӗ. Унта ҫавӑн пекех куар-код вырнаҫтарнӑ. Вӗсем видеоматериалпа паллашма май параҫҫӗ. Уява пухӑннисем библиотекӑра ӗҫлекенсене тав турӗҫ, вулавӑша аталантарассипе нумай ҫул тӑрӑшакансене Хисеп хучӗсемпе чысларӗҫ. Ятарлӑ библиотекӑна ҫурекенсемех хӑйсен вӑйӗпе хатӗрленӗ концерт кӑтартрӗҫ.
Надежда Александрова, Святослав Петров
