Хуҫисем хӑйсен тӑватӑ ураллӑ тусӗсене капӑр тум-тир тӑхӑнтартнӑ. Ку йытта, тӗслӗхрен, Денди тесе чӗнеҫҫӗ. Вӑл пират костюмӗпе парада хутшӑнать. Теприсем вара илемлӗ шӗлепкесемпе. Чылай ҫын ҫак уява кӗтнӗ. Нумайӑшӗ ҫемйисемпех килнӗ.
Сӑмах май, парадӑн чи малти ретӗнче - приютра пурӑнакан чӗрчунсем. Волонтерсем уява 10 йытӑ ҫавӑртса пынӑ. Вӗсене кам та пулин кил ӑшши парнелессе шанаҫҫӗ. Ырӑ тӗслӗхсем пур-ха. Унччен хуҫасӑр пулнӑ 100 яхӑн анчӑк уява ҫитнӗ.
Акӑ, Эзран та хуҫи тупӑннӑ. Ун пирки эпир эфирта пӗрре мар каласа кӑтартнӑччӗ. Эзрӑна Карамалькинсен ҫемйи хӑйсен хӳттине илнӗ. Килсӗр чӗрчунсен ҫивӗч ыйтӑвне хускатас тӗллевпе парада йӗркеленӗ те. Кӑҫалхипе - 2-мӗш хут. Хула пухӑвӗн депутачӗн Максим Гребенкинӑн сӑмахӗпе: чылай регионта йытӑсене регистрацилеме пуҫланӑ. Чӑваш Енре те ҫак пуҫарӑва аталантармалла. Вӑл чылай ыйтӑва уҫӑмлатма пулӑшӗ. Тӗслӗхрен, килти е ҫапкаланса ҫӳрекен йытӑ ҫыртнӑ тӗслӗх ытларах? Парада хӑнасем Мускавран тата Йошкар-Оларан та ҫитнӗ. Тӑвата ураллӑ спортсменсем хӑйсем мӗн пултарнипе тӗлӗнтерчӗҫ.
Уяв Шупашкарта йытӑ хуҫисем чылай пулнине кӑтартрӗ. Апла пулсан чӗрчунсемпе уҫӑлса ҫӳремелли лаптӑксем кирлех. Ҫак енпе вырӑнти влаҫсем ӗҫлеҫҫӗ-ха. Пӗлтӗр Шупашкарта виҫӗ ятарлӑ вырӑн йӗркеленӗ. Кӑҫал та ҫавӑн чухлех хута ярасшӑн. Сӑмах май, уяв вӑхӑтӗнче пухӑннисене ятарлӑ хутаҫсемпе тивӗҫтерчӗҫ. Ҫавӑнпа та Юрӑ лапамӗ йытӑсем хыҫҫӑн тасах юлчӗ.
Вероника Павлова, Святослав Петров
