Концерт чӑваш музыкин пӗрремӗш симфони хайлавӗпе Федор Павловӑн "Сӑрнайпа Палнай" балет фантазийӗпе пуҫланчӗ. Куракансем ӑна хавхаланса, тӑвӑллӑн алӑ ҫупса йышӑнчӗҫ. Ун хыҫҫӑн оркестр Александр Васильев ҫырнӑ "Чӑваш кӗввисем" ятлӑ виҫӗ пайран тӑракан ярӑма янратрӗ. Паллӑ композиторӑн вилӗмсӗр хайлавӗсем тӑван кӗвӗсен илемне аса илтерсе чуна хускатрӗҫ.
- Александр Осипов Геннадий Айхи сӑввисем тӑрӑх ҫырнӑ Триосенче поэтӑн хӑйне евӗрлӗ философи шухӑшӗсене автор музыка жанрне кӗртме тӑрӑшни палӑрать. Ку, паллах, ҫӑмӑл мар ӗҫ. Ҫавӑнпа эпӗ ӑна кӑмӑлларӑм, автора чун-чӗререн тав тӑватӑп, - терӗ педагогика университечӗн профессорӗ Юлия Дмитриева дирижер.
Вокал партине Татьяна Фуртас шӑрантарчӗ, сӗрме купӑс партине Валерьян Иванов каларӗ.
Любовь Бушуева флейта валли çырнă пьеса тăван кĕвĕсен илемне кăтартакан хайлавсемпе пĕрле килĕшсе янрарĕ. Шупашкарти музыка училищин студенчĕсем Лариса Быренковăпа Раиса Сарпи Шупашкар юбилейне халалласа хор валли ҫырнă юрӑпа паллаштарчӗҫ.
- Концертсене укҫасӑрах ирттертӗмĕр. Анчах тăкаксăр ним те пулмасть. Вĕсене саплаштарма пире Раççей Федерацийĕн культура министерствипе Композиторсен союзĕ пулăшрĕç. Сӑмах май каласан, чăваш композиторĕсен пӗрлӗхӗ пӗлтӗр Раççей композиторĕсен союзĕн Чăваш уйрăмӗ пулса тăчĕ, - терĕ композиторсен правленине ертсе пыракан Лолита Чекушкина.
Концертра Юрий Григорьевăн трагедиллĕ музыки чуна уйрӑмах хумхантарчĕ. Автор юлашки çулсенче симфонисем çырать. Музыкăн чи кăткăс жанрĕ халăх пурнăçĕпе истори пулăмĕсене сӑнарлать. Андрей Галкин композитор Шупашкар юбилейне халалласа симфони оркестрĕ валли ятарласа увертюра хайланă. Капелла хорĕпе оркестр Лолита Чекушкинан «Нимене» ятлă хайлавне те чуна пырса тивмелле янратрĕ.
Леонид Петров, Виктор Степанов
