Кӑмпа та ир тӑракана кӑмӑллать, чи лайӑххи маларах ҫитекене лекет. Фестиваль те чи тулли карҫинкка хуҫине палӑртассинчен пуҫланчӗ. 2-мӗш ҫул ку ӑмӑртура ҫӗнтерӳҫӗ ятне Татьяна Амосова алӑран вӗҫертмест. Унӑн ҫак ӗҫри вӑр-варлӑхӗ ачисемпе мӑнукӗсене те куҫнӑ. Карапай-Шӑмӑршӑри кӑмпа ӑстине таврара аван пӗлеҫҫӗ, пӗрле ертсе кайма ыйтакансем те пур. Шлепкеллӗ ҫимӗҫе вӑл кӑҫал 7 меслетпе тӑварланӑ.
Вӑрманта шӑна кӑмпи тӗл пулсан чылайӑшӗ ӑна тапса хӑварать. Илӗртӳллӗ, анчах наркӑмӑшлӑ ят илнӗскертен пӑрӑнса иртетпӗр. Васан ялӗнчен фестивале килнӗ ушкӑн вара унӑн асамлӑ хӑватне ӗненса шӳтлет.
Республикӑри тӗрлӗ тӑрӑхран маттур кӑмпаҫӑсене, тӗпелте ҫак ҫимӗҫрен темӗн те пӗҫерме пӗлекенсене "Чӑваш вӑрманӗ" хапӑл пулчӗ ҫак кун. Чи хастаррисем - яланхилле фестиваль хуҫисем - шӑмӑршӑсем. Ушкӑнӑн-ушкӑнӑн пухӑнса килнисем кам техӗмлӗ ӗҫми-ҫимипе, хӑшӗ юрӑ-ташӑри пултарулӑхӗпе, теприсем ҫи-пуҫӗпе тӗлӗнтерчӗҫ.
Чӑн-чӑн кӑмпаҫӑ ҫак ҫимӗҫ хӑш тӗлте карти-картипе ӳснине ыттисене пӗлтеремест. Фестивальте вара кашниех ӑнӑҫлӑ вырӑнсене те, харпӑр хӑйӗн рецепчӗсене те кӑмӑлпах уҫса пачӗ. Кӑмпа яшки, ытти сӑй техӗмӗ таврана сарӑлса пурне те тӗпелелле иртме илӗртрӗ. Кунтах пылпа сӑйланма та, курӑк чейӗпе ӑша кантарма та, йывӑҫ-каскаран тунӑ парнесем туянма та май пулчӗ. Юрӑ-ташӑ, лотерея, чи хитре кӑмпа тумне палӑртасси... Фестивалӗн пуян программи хӑнасене ҫулран-ҫул тӗлӗнтерет.
Шӑмӑршӑ ҫӗрӗнче кӑмпа фестивалӗ 2013-мӗш ҫултанпа иртет. Ҫак хушӑра ун ячӗ ытти регионсене те ырӑпа сарӑлма ӗлкӗрнӗ. Кӑҫал хӑнасем Мускавран, Сарӑ ту, Чӗмпӗр облаҫӗсенчен, Тутар Республикинчен килсе ҫитнӗ.
Алиса Александрова, Наталия Егорова, Святослав Петров
