Шупашкарта шавлӑ туй кӗрлесе иртрӗ: слоуп-стайл тата биг-эйр енӗпе Раҫҫей чемпионӗ пулса тӑнӑ Дмитрий Мулендеев авланчӗ. Мӑшӑрӗ те - ят илнӗ спортсмен: вӑл упӑшкипе фристайл енӗпе Раҫҫейӗн пӗрлештернӗ командинчи, икӗ ҫул каялла Пекинра иртнӗ 23-мӗш хӗллехи Олимпиадӑна хутшӑннӑ Полина Смоленцова сноубордист. Дмитрийӑн йӑх тымарӗсем - Патӑрьел тӑрӑхӗнчен: амӑшӗ, Нина Баранова, Анат Туҫаран, ашшӗ - Нӑрваш Шӑхальте ҫуралса ӳснӗ.
"Патӑрьел" ентешлӗхӗн ертӳлӗхӗ Чӑваш Ен мӑнаҫлӑхӗ пулса тӑнӑ спортсмена, Раҫҫейӗн 7 хут чемпионне чыс тума, ҫитӗнӗвӗсемпе аталану ҫулӗ ҫинчен ыйтса пӗлме ҫавра сӗтел хушшинчи калаҫӑва пуҫтарӑнчӗ, ҫамрӑк ҫынсене парне парса хавхалантарчӗ. Ҫакӑ пӗрлелӗх туйӑмне вӑйлатма, ытти яш-кӗрӗме ырӑ тӗслӗх кӑтартма кирлӗ тесе шутлаҫҫӗ патӑрьелсем.
Дмитрий халӗ 27 ҫулта. Фристайла 11-те чухне суйласа илнӗ. Малтан вара хӑйне спортӑн тӗрлӗ тӗсӗсенче тӗрӗслесе пӑхнӑ, ӑҫта ытларах пултараяссине шыранӑ. Пӗрремӗш тренерӗ - кӗрешӳ енӗпе Раҫҫей спорт мастерӗ Сергей Семёнов: ун патне арҫын ача ҫур ҫул ҫӳренӗ.
"Никита Валерьевич пулман пулсан эпӗ те кун пек спортсмен пулаймастӑм", - тет Дмитрий тренерне тав туса. Утӑм хыҫҫӑн утӑм туса, кӑткӑс программӑна алла илсе ӳссе пынӑ умне тӗллев лартса ҫӗнтерме пултаракан ҫамрӑк. Кашни ӑмӑртурах шалти мӗнпур хӑватне пухса, хӑйне хӑй алла илсе вӗрентекенӗн, ашшӗ-амӑшӗн шанӑҫне тӳрре кӑларса пынӑ вӑл. Уншӑн ашшӗ ача чухнехиллех пысӑк тӗслӗх: Сергей Васильевич темле ӗҫлӗ пулсан та тӑван ялӗ пирки те манмасть.
Мулендеевсен ҫемйинче 4 врач, 2 профессиллӗ спортсмен - хӗрӗ те ухӑран перес енӗпе спорт мастерӗ. Халӗ ӗнтӗ ҫак туслӑ йыша кинӗ те хутшӑнать. Дмитрий стоматолог, шӑл тухтӑрӗнче ӗҫлеме те, Раҫҫейӗн пӗрлештернӗ командин тренерӗнче вӑй хума та ӗлкӗрсе пырать. Ентешӗсене унӑн вӗренекенӗсем хушшинче шанчӑк паракан чӑваш ачисем те пурри савӑнтарать. Дмитрийӑн тӗллевӗ - Шупашкарта фристайл центрне уҫасси, вара ҫав тренировка комплексӗнче ҫӗршыв кубокӗсене те, тӗнче ӑмӑртӑвӗсене те йышӑнма пулӗччӗ.
Ҫак кунсенче Дмитрий Раҫҫейӗн пӗрлештернӗ командине тренировкӑна Сахалина илсе каять. Унта трюксем тума пысӑк минтер пурри илӗртет. Чӑваш спортсменӗсем ҫӗнӗ ҫитӗнӳсемшӗнех Китая та ҫитесшӗн.
Марина Карягина, Екатерина Янгалакова
