Иртнӗ пултарулӑх сезонӗнче культура учрежденийӗсем 2 пин те 800 ӗҫ-пуҫ йӗркеленӗ. Вӑл шутра театрсем 58 ҫӗнӗ спектакль лартнӑ. Пурӗ вӗсене 850 пин ытла куракан пахаланӑ. 135 пин ытла билет Пушкин карттипе туяннӑ. Культура министрӗ Светлана Каликова пухӑннисене саламланӑ май, ҫӗнӗ сезонра "Культурӑллӑ юнкун" проект пурнӑҫа кӗртессине пӗлтерчӗ. Республикӑри патшалӑх театрӗсемпе концерт учрежденийӗсем уйӑхне икӗ хут ытти хуласемпе округсене ҫитсе вырӑнти куракансемпе тӗл пулӗҫ. Вӑл шутра ҫӗнӗ спектакльсемпе паллаштарӗҫ.
Сцена ӑстисене Республика Пуҫлӑхӗ Олег Николаев ӑшшӑн саламларӗ. Ҫак тытӑмра нумай ҫул тӑрӑшакансене тата тӗрлӗ ҫитӗнӳпе палӑрнисене патшалӑх наградисем парса чысларӗ. Артистсем юратнӑ кураканӗсем валли нумай кӑсӑкли хатӗрленӗ. Шӑпах ҫӗнӗ ӗҫсен сыпӑкӗсене уява пуҫтарӑннисем хаклама пултарчӗҫ. Чӑваш патшалӑх оперӑпа балет театрӗ "Акӑш" номерпе тыткӑнларӗ.
Культура учрежденисене ҫак тытӑмри наци проекчӗ пысӑк пулӑшу кӳрет. Тӗрлӗ конкурспа фестиваль те ҫулсерен ҫӳллӗ шайра иртет. Ҫакӑ йӑлтах Чӑваш Ен культурин хӑйнеевӗрлӗхне упраса хӑварса аталанма, ҫӗнӗ постановкӑсем лартма май парать.
"Пушкин картти" проекта пурнӑҫа кӗртессипе республика ҫӗршывра малтисен ретӗнче. Унӑн майӗсемпе республикӑри ҫамрӑксен 99 проценчӗ усӑ курать. Эппин ӳсекен ӑрӑва ӳнер тӗнчине явӑҫтарасси те аван пулса пырать.
Оксана Верликова, Екатерина Янгалакова
