Алексей Андреевӑн хуҫалӑхӗ нумай пулмасть ӗҫлесе кайнӑ. Халӗ кунта кунне пӗр тонна сӗт тирпейлеҫҫӗ - 25 кило сыр тата 60 ытла кило тӑпӑрч тӑваҫҫӗ. Кунта туристсене те хапӑл. Хӑнасене сыр пӗҫерме, унтан тутанса пӑхма сӗнеҫҫӗ. Килӗшсен - туянма та пултараҫҫӗ. Елизавета Солдатова технолог ӗҫлеме те, вӗренме те ӗлкӗрет. Вӑл Чӑваш патшалӑх аграри университетӗнче 4-мӗш курсра пӗлӳ пухать.
Туристсем валли сӑн ӳкерӗнмелли ятарлӑ вырӑн та йӗркеленӗ. Унсӑр пуҫне ӑсталӑх урокӗсем ирттерме чатӑр лартнӑ. Алексей Андреев - малӗмӗтлӗ ҫамрӑк. Пӗрмай аталанма тӑрӑшать. Халӗ "Агротуризм" грантне илес тӗллевлӗ. Документсене ярса панӑ ӗнтӗ, пӗтӗмлетӳсене кӗтет. Унччен те патшалӑх пулӑшӑвӗпе усӑ курнӑ.
"Чебомилк" пӗрлешӳре те туристсене хавас. Кӑҫалхи ҫурла уйӑхӗнче ӑратлӑ выльӑх аукционне ирттернӗ хыҫҫӑн кунта хӑнасене ытларах йышӑнма тытӑннӑ. Вӗсене турттарма ятарлӑ электромобиль те пур. Унта 10 ҫын ларма пултарать. Экскурсине Татьяна Макау ирттерет. Ҫавӑн пекех вӑл завхозра ӗҫлет.
Предприяти пирки нумай кӑсӑклине каласа кӑтартать. Ку фермӑра, тӗслӗхрен, 600 ӗне. Вӗсене вара 1 ҫын кӑна пӑхса тарать. Ӗҫе пӗтӗмпе механизациленӗ. Кун пекки пурӗ 6 вите. Пурте вӗсем ӗнесен тата сӗт ӑшшипе ӑшӑнса тӑраҫҫӗ. Пӗчӗк пӑрусене уҫӑ ҫӗрте тытаҫҫӗ. Мӗн пӗчӗкрен сивве хӑнӑхса уснӗрен вӗсем чирлемеҫҫӗ. Ҫакӑн пек тухӑҫлӑ ӗҫлекенсене патшалӑх енчен те пулӑшма хатӗр. "Агротуризм" пуласлӑхӗ пысӑк. Чи пӗлтерӗшли вӑл ялсене аталанма пулӑшать.
Надежда Александрова, Святослав Петров
