8-мӗш гимнази 1991-мӗш ҫултанпа ӗҫлет. Унтанпа ӑна пӗрре те юсаман пулнӑ. Патшалӑх программипе 2022-23-мӗш ҫулсенче тинех учреждение ҫӗнетнӗ. Вӑл тултан та, шалтан та палӑрмалла улшӑннӑ. Урайӗ-маччи таранах юсанӑ, коммуникаци тытӑмне ҫӗнӗрен тунӑ. Ҫутӑ та хӑтлӑ пӳлӗмсем йӗркеленӗ. Пурлӑхпа техника никӗсне те самай пуянлатнӑ. 6 миллион тенкӗлӗх интерактивлӑ доскасем, сӗтел-пукан, хальхи йышши ытти хатӗр туяннӑ. Гимназинче ку вӗренӳ ҫулӗнче 700 ытла ача вӗренет. Кӑҫал пӗрремӗш хут парта хушшине 74-ӑн ларнӑ.
Кӑҫал тата гимнази картишне тирпей-илем кӗртме май килнӗ. Лаптӑка хӑтлӑх кӳме республика тата хула хыснисенчен 16 миллион тенке яхӑн уйӑрнӑ. Унсӑр пуҫне урамри ҫутӑ тытӑмне ҫӗнӗтме 3 миллион тенкӗ ытла тӑккаланӑ. Ҫӗмӗрлери ытти шкул те картишӗсене йӗркене кӗртнӗ. 8-мӗш гимназире ҫакӑнпа ӗҫ вӗҫленмен. Халӗ кунта спорт лаптӑкӗ тума документсем хатӗрлеҫҫӗ.
Диана Иванова, Димитрий Макаров
