Ӑмӑртура 30-а яхӑн вӑрман касакан тупӑшма килнӗ - Чӑваш Енӗн тӗрлӗ кӗтесӗнчи ӑстасемпе пӗрле кӳршӗллӗ Мари тата Тутар республикисенчен, ҫавӑн пекех Брянск облаҫӗпе Карелинчен ҫитнӗ. Кашниех ку таранччен пин-пин йывӑҫ касса тирпейленӗ. Тӗрлӗ шайри тупӑшусенче те пӗр-пӗринпе вӑй виҫнӗ. Карелинчи Александр Соколов, калӑпӑр, тахҫанах хӑй тӑрӑхӗнче палӑрнӑ, ҫӗршывра иртекен ӑмӑртура ҫӗнтернӗ, тӗнче чемпионӗ ята тивӗҫме пултарнӑ. Ҫакӑн пек ҫитӗнӳсем конкурс сумне ҫеҫ мар, вӑрман касакансен ӗҫне хисеп тӑваҫҫӗ, ытларах ҫамрӑка профессие явӑҫтарма пулӑшаҫҫӗ. Ӑстасен ӗҫне тӳресем хакласа чи лайӑххисене палӑртрӗҫ.
Вӑрман касакансен ӑсталӑхне хакламалли хӑнӑхтарусем татах та пулчӗҫ. Пӑчкӑ сӑнчӑрне улӑштарасси ҫӑмӑлах мар, иккен. Кулленхи ӗҫре пӗрмаях аппаланма тивет, кунта вара сӑнчӑра вӑхӑтпа пуҫтармалла. Конкурса хутшӑнакансем пӗрене те касрӗҫ, туратсенчен те тасатрӗҫ. Профессионалсем тата лесничествӑра ӗҫлекенсем уйрӑммӑн ӑмӑртрӗҫ. Вӑрман чи лайӑх касакан ята тивӗҫессишӗн хӗрарӑмсем те тупӑшрӗҫ. Шупашкар вӑрман хуҫалӑхӗнче тӑрӑшакан Галина Климина ар ҫынсемпе тан мӗн пултарнине кӑтартрӗ. Ачаранпах ашшӗне кура йывӑҫ касма хӑнӑхса ҫитӗннӗ, халӗ хӑй те 4 ача амӑш, ҫавах та йывӑр ӗҫе пӑрахас кӑмӑлӗ ҫук. Елена Сафиуллина Тутарстанран килнӗ. Вӑрман хуҫалӑхӗнче секретарьте тӑрӑшакан чӑваш хӗрӗ йывӑҫ касма та вӗренсе ҫитнӗ.
Конкурс пӗтӗмлетӗвӗ тӑрӑх, профессионалсем хушшинче Карелири Александр Соколова ҫитекенни пулмарӗ. Чӑвашсенчен Артём Шашков 2-мӗш вырӑн йышӑнчӗ. Вӑрман хуҫалӑхӗнче тӑрӑшакансенчен Йӗпреҫ, Улатӑр тата Вӑрнар лесничествисенче ӗҫлекенсем палӑрчӗҫ. Ҫӗнтерӳҫӗсем ҫӗршыв шайӗнчи ӑмӑртура республика чысне хӳтӗлӗҫ. Йывӑҫ касакансен Раҫҫей чемпионачӗ авӑн уйӑхӗнче Пермь хулинче иртет.
Ирина Николаева, Степан Гурьянов
