Республикӑра "Твои звезды над Шоршелами" ҫӗнӗ вӗренӳ проекчӗ вӑй илчӗ

Проект шучӗпе нумай кӑсӑклӑ ӗҫ-пуҫ палӑртнӑ. Вӑл шутра тӗрлӗ темӑна хускатакан уроксем, класс сехечӗсем, вӑйӑсем тата ытти те. 59-мӗш шкулта 11-мӗш класра вӗренекенсемпе уҫӑ урок иртрӗ. Ӑна тупӑшу евӗр йӗркелерӗҫ. Ачасем икӗ ушкӑна пайланса ӑмӑртрӗҫ. Историпе обществознани вӗрентекен Светлана Фролова кашнине Андриян Николаевпа ҫыхӑннӑ тӗрлӗ ыйту пачӗ. Ачасем хӑйсен пӗлӗвне викторинӑра та, интерактивлӑ вӑйӑра та тӗрӗслерӗҫ. Кунта вара сӑн ӳкерчӗк ҫинче кам пулнине палламалла. Вӗренекенсем космонавтӑн ачалӑхӗ, ҫамрӑк чухнехи пурнӑҫӗ пирки те нумай пӗлчӗҫ. Шуршӑл паттӑрне халалланӑ проекта республикӑри пур вӗренӳ учрежденийӗ те хутшӑнать.

Етӗрнери 3-мӗш вӑтам шкулта та Андриян Николаев ҫуралнӑранпа 95 ҫул ҫитнине паллӑ тума тӗплӗн хатӗрленнӗ. Космос темипе ӳкерчӗксен куравне йӗркеленӗ. Ҫамрӑк космонавтсен "Альтаир" отрячӗн хастарӗсем концерт кӑтартрӗҫ. Унсӑр пуҫне 10 ҫултан пуҫласа 17 ҫулчченхи ачасем анимаци геройӗсене шутласа кӑлармалли конкурса хутшӑнаҫҫӗ. Ҫӗнтерӳҫӗсен сӑнарӗсене малашне мультфильмсемпе видеосенче усӑ курӗҫ. Конкурса Космонавтика кунӗнче, ака уйӑхӗн 12-мӗшӗнче пӗтӗмлетӗҫ. Чи пултаруллисем валли ача-пӑчапа ҫамрӑксен "Эткер" центрӗнче профиллӗ смена йӗркелеҫҫӗ.

Диана Иванова, Святослав Петров