Артистсем килессе уйрӑмах шкул ачисем чӑтӑмсӑр кӗтнӗ. Вӗсемшӗн ку театр хальлӗхе ҫӗнӗлӗх. Тӑван хулари сцена ҫинче вырӑс классикӗн пьеси тӑрӑх лартнӑ спектакле курма ӗмӗтленнине пытармарӗҫ вӗренекенсем. Шкул ачисемпе тӗл пулма артистсем те хавас - ҫӗнӗ ҫӗрте вылясси вӗсемшӗн те кӑсӑклӑ. Паллах, ытти ҫӗрте пурӑнакансене тӗп хулана спектакль курма тухса ҫӳреме ҫӑмӑлах мар. Халӗ вара театрсем хӑйсем хӑнана ҫитеҫҫӗ.
Республикӑри муниципалитетсенче кӑтартакан спектакльсем шкул программипе ҫыхӑннӑ. Ҫакӑ, уйрӑмах, педагогсемшӗн меллӗ пулнине палӑртрӗ культура министрӗн ҫумӗ Георгий Богуславский. Постановкӑсене "Пушкин карттипе" курма май пур. Проект ытларах ҫынна культурӑпа ҫывӑхрах паллашма пулӑшӗ.
Республикӑри театрпа концерт учрежденийӗсем черетлӗ ҫул ҫӳреве паян тухаҫҫӗ. Сӑмахран, Улатӑрти культура керменӗнче Чӑваш патшалӑх академи симфони капеллин концерчӗ пулать. Вырӑс драма театрӗ вара патӑрьелсене камитпе савӑнтарӗ. Ҫамрӑксен театрӗн артисчӗсене Комсомольскинчи культура керменӗнче кӗтеҫҫӗ.
Оксана Верликова, Екатерина Данилова, Виктор Степанов
![](https://px201.medhills.ru/s.gif?mh_id=777c56a4b49d816169e518f01a42b09d&mh_news=Республикӑра "Культурная среда" проект ӗҫлеме пуҫланӑ&mh_tags=чувашский выпуск,&mh_page=http://chgtrk.ru/novosti/nacionalnye-novosti/respublikara-kulturnaya-sreda-proekt-ecleme-puclana/){kind=small}