Конкурса "Единая Россия" партин «Истори астăвăмĕ» проекчĕпе килӗшӳллӗн пуҫарнӑ. Регионта ку ӗҫе Чӑваш патшалӑх университечӗн ректорĕ Андрей Александров йӗркелесе пырать. Кӑҫалхи конкурса ятарлӑ ҫар операцийӗнчи салтаксене халалланӑ. Чӑваш Енрен унта 55 управӑш хутшӑннӑ. Шупашкарти 37-мӗш шкулти Ҫар мухтавӗн музейӗ ку ӑмӑртура пӗрре мар палӑрнӑ. Кӑҫал вӗсем 2-мӗш вырӑн йышӑннӑ. Уявра вӗсене 300 пин тенкĕлĕх сертификат тата диплом парса саламларĕҫ. Ку укҫана ятарлӑ ҫар операцийӗнчи салтаксене халалланӑ экспозицине пуянлатнӑ ҫӗре яма палӑртаҫҫӗ.
Вӑрмар тӑрӑхӗнчи Раҫҫей Геройӗ Александр Николаев ячӗллӗ Кӗтеснер шкулӗнчи историпе тӑван тавралӑх музейӗ вара ялсенчи управӑшсем хушшинче 3-мӗш вырӑн йышӑннӑ. Унӑн историйӗ анлӑ та пуян. Музейра упранакан экспонатсем аваллӑхран пуҫласа хальхи пурнӑҫ аталанӑвӗ таранах сӑнлаҫҫӗ. Паттӑрсен ӗҫӗ-хӗлне те пысӑк тимлӗх уйӑраҫҫӗ.
Музей ӗҫӗ-хӗлне аталантарма 200 пин тенкĕлĕх сертификат тата диплом парса саламларĕҫ. Ку укҫана ӑҫта ярассине шкул коллективӗ пӗр сӑмахлӑ пулса палӑртса хунӑ та ӗнтӗ.
"Единая Россия" партин «Истори астăвăмĕ» проекчӗпе килӗшӳллӗн ҫавӑн пекех "Ҫӗнтерӳ диктанчӗ" акци йӗркелеҫҫӗ. Кӑҫал унта пурӗ регионти 600 ытла лаптӑкра 19 пин ҫын хутшӑннӑ. Ку енӗпе хастарлӑх кӑтартнӑ шкулсемпе пӗрлешӳсене те тав ҫырӑвӗсем парса хахалантарчӗҫ.
Оксана Верликова, Михаил Солин
