Кун пек ӗҫ-пуҫа пӗрремӗш хут йӗркеленӗ пулин те, халӑх йышлӑ пухӑннӑ. Ишлӗ Шетмӗре пурӑнакансем кӑна мар, таврари мӗн - пур ялтан. Ҫут ҫанталӑка упрасси, уйрамах ҫӑлкуҫ теми, нумайӑшне пӑшӑрхантарать. Вӗсем пӗчӗк тата пысӑк кӳлӗсемпе юханшывсен пуҫламӑшӗ. Фестивальте Патӑрьел тӑрӑхӗнчи ҫӑлкуҫсенчи шыв пахалӑхне шкул ачисемпе волонтерсем тӗрӗслерӗҫ. Пурӗ 27 тӗслӗх илсе килнӗ. Вӑл шутра Пӑва юханшывӗнчен. Пурин те кӑтартӑвӗсем йӗркеллӗ - ӗҫме юрӑхлӑ. Чан та, Пӑва шывне вӗретме сӗнеҫҫӗ.
Фестивале Министрсен Кабинечӗн председателӗн ҫумӗ - ял хуҫалӑх министрӗ Сергей Артамонов хутшӑнчӗ. Вӑл экологи темипе хатӗрленӗ лаптӑксемпе паллашрӗ. Ачасем усӑ курнӑ япаласенчен илемлӗ япаласем хатӗрлеме пултарнӑ.
Уявра ҫӑлкуҫсене тасатассипе тӑрӑшакансене чысларӗҫ. Трактор музейӗн директорӗ Альберт Сергеев, сӑмахран, хайӗн тӑван Элӗк тӑрӑхӗнчи Анат Татмӑшра ку енӗпе нумай тимлет. Татьяна Федорова Шӑмӑршӑ тӑрӑхӗнчи Пулмантӑш ялӗнче ҫуралса ӳснӗ. Вӑл пуҫарнипе тӑван кӗтесӗнчи 300 ытла ҫӑлкуҫа ушкӑнпа тирпейленӗ. Ӑна шкул ачисем, тӑванӗсем хастар пулӑшаҫҫӗ. Патӑрьел тӑрӑхӗнчи Тури Туҫа ялӗнчи "Ҫӑлкуҫ" ушкӑн экологи уявне хутшӑнмасӑр тӑма пултарайман. Вӗсем хӑйсем те тавралӑха тирпейлес ӗҫе тӑтӑшах хутшӑнаҫҫӗ, ушкӑн ятне тӳрре кӑлараҫҫӗ.
Фестивальте Пӑва юханшывӗ тата ку тӑрӑхри ҫӑлкуҫсем пирки ҫавра сӗтел ирттерчӗҫ. Унта хутшӑнакан ӑсчахсемпе таврапӗлӳҫӗсем ҫивӗч ыйтусем хускатрӗҫ. Ҫут ҫанталӑка сыхлассипе ҫыхӑннӑ ыйту чӑнах та нумай пулнине шута илсе кун пек фестивале ҫитес ҫул та ирттерес тӗллевлӗ.
Надежда Александрова, Димитрий Макаров, Михаил Солин
