Сергей Михайлов Кӗлӗмкасси вӑтам шкулӗнче 1987-1997-мӗш ҫулсенче вӗреннӗ. Вӑл ачаранах спорта юратнӑ. Ҫӑмӑл атлетикӑна та, волейбола та килӗштернӗ. Ирӗклӗ майпа кӗрешессипе вара пӗрре мар республика чемпионӗ пулнӑ. Ӑмӑртӑва пуҫличчен салтакӑн тӑванӗсем, юлташӗсем, сумлӑ хӑнасем паттӑра ырӑпа аса илчӗҫ, асӑну хӑми умне чечексем хучӗҫ. Шкулти ҫамрӑк армеецсем хӑйсен ӑсталӑхне кӑтартрӗҫ.
Сергей Михайлов подполковник мотострелоксен батальонӗн командирӗ пулнӑ. Шел пулин те, ятарлӑ ҫар операцийӗнче, 2022-мӗш ҫулхи ака уйӑхӗнче Луганск Халӑх Республикине тӑшманран хӳтӗлесе паттӑрла пуҫ хунӑ. Кӗлӗмкасси ывӑлне "Паттӑрлӑхшӑн" тата Луганск Республикин "Службӑри хӑюлӑхшӑн" орденсемпе наградӑланӑ. Пухӑннисем комбат ячӗпе йӗркеленӗ тупӑшу ҫитӗнекен ӑрӑва малалла талпӑнма хистесе тӑрассине палӑртрӗҫ. Ирӗклӗ майпа кӗрешекенсен турнирне Шупашкарпа Канаш хулисенчен, Вӑрнар, Елчӗк, Канаш, Шупашкар тӑрӑхӗсенчен 230 ытла ҫамрӑк килнӗ. Спортсменсем 20 виҫе ушкӑнӗнче вӑй виҫрӗҫ.
Кил хуҫисем паттӑр ятне ямарӗҫ. Тӗрлӗ ушкӑнра ылтӑн медальсем ҫӗнсе илсе Йӗпреҫ тӑрӑхӗн ҫӗнтерӳ ялавне ҫӳле ҫӗклерӗҫ. Мала тухнисене дипломсем, медальсем тата парнесем парса хавхалантарчӗҫ. Ку турнир ырӑ йӑлана кӗрессе шанаҫҫӗ кӗлӗмкассисем.
Диана Иванова
