Курава Мускаври космонавтика тата Чӑваш наци музейӗсем, Шуршӑлти Андриян Николаев ячӗллӗ асӑну комплексӗ пӗрле тӑрӑшса ӗҫленипе йӗркеленӗ. Унпа паллашакансем мӗн-ши вӑл космос ыйту ҫине хурав тупма пултарӗҫ.
Куравра космос аппарачӗсенчен пуҫласа космонавтсен япалисем таранах курма пулать. Уҫлӑхра пулнӑ тӗнчери чи пӗрремӗш спутник макетне Мускавран илсе килнӗ. "Восход-2" карапа та тӗпчеме май пур. Унпа Алексей Леонов вӗҫнӗ, пӗрремӗш хут кабинӑран уҫлӑха тухнӑ. Ҫавӑн пекех экпозицире Андриян Николаевӑн скафандрӗ, "Вызов" фильма ӳкерме космоса ҫӗкленнӗ Юлия Пересильд артист тӑхӑннӑ костюм пур.
Тӗнче уҫлӑхӗн вӑрттӑнлӑхӗпе илемне ӳнерҫӗсем те хӑйсен ӳкерчӗкӗсенче уҫса пама тӑрӑшнӑ. Проектра Михаил Ромадинӑн ӗҫӗсене «Ӗлӗкхи, паянхи тата пуласлӑхри» ятпа вырнаҫтарнӑ. Тепӗр пӳлӗмре вара паллӑ ӳнерҫӗ-фантаст Андрей Соколов шутласа кӑларнӑ карапсене те, чӑнлӑхри космос аппарачӗсене те курма пулать. Палӑртса хӑвармалла, Андрей Соколов чылай вӑхӑт хушши Алексей Леонов космонавтпа пӗрле тачӑ ҫыхӑнура ӗҫленӗ. Ҫавна май пир ҫине нумай япала куҫарма пултарнӑ.
Пуканесем, уҫлӑх темипе ҫыхӑннӑ херарӑмсен капӑрлӑхӗсем те пуриншӗн те кӑсӑклӑ пулӗҫ.
Космосӑн илемлӗхӗпе тата мӑнаҫлӑхӗпе киленес текенсене Ехрем купса бульварӗнчи Музейпа курав центрӗнче раштав уйӑхӗн 20-мӗшччен кӗтеҫҫӗ.
Оксана Верликова, Андрей Шоклев
