Мускавра йӑлана кӗнӗ "Ылтӑн кӗркунне" агропромышленноҫ куравӗ ӗҫлет

Кӗр мӑнтӑрӗпе хатӗрленӗ курав пуян та тулӑх. Регионсен экспозицийӗсем пӗринчен тепри илӗртӳллӗ. "Ылтӑн кӗркунне" форум  кӑҫал эмбарго тапхӑрӗнчи ҫитӗнӳсемпе паллаштарать. Раҫҫей тӗлӗшпе санкцисем йышӑннӑранпа 10 ҫул ҫитрӗ. Пирӗн республика стендне тӳрех палласа илме пулать. Наци эрешӗсемпе, явкаланчӑк хӑмла аврисемпе илемлетнӗ ӑна. Фермерсем, ял хуҫалӑх предприятийӗсем кӑларакан апат-ҫимӗҫӗ те сӗтел тулли.

Чӑваш Ен хӑмла туса илессине аталантарассипе тӗллевлӗ ӗҫлет. Аграри университетӗнче Компетенци центрӗ туса хунӑ, хӑмла татакан, типӗтекен комбайн кӑларма тытӑннӑ. Тӗнчери коллекци те - "симӗс ылтӑнӑн" 250 сорчӗ - пирӗн тӑрӑхра упранать. Унпа курав хӑнисене те паллаштарчӗҫ. Республика Пуҫлӑхӗ Олег Николаев Михаил Мишустин премьер-министра хӑмла ӗҫне аталантарма пулӑшу кӳнӗшӗн тав турӗ. Иртнӗ 10 ҫулта агропромышленноҫ предприятийӗсем продукци калӑпӑшне икӗ хут ӳстернине пӗлтерчӗ. Тӗпрен илсен, тӗш тырӑ, кӗрпе, ҫӑнӑх, минераллӑ шыв, мороженӑй ытларах кӑларма пуҫланӑ. Ҫӗнӗ производствӑсем те хута янӑ. Сӑмахран, 10 ҫул каялла республикӑра сыр пӗҫерен пӗр предприяти кӑна пулнӑ пулсан, халӗ вӗсем 17. Чӑваш Ен сӗтпе, аш-какайпа, пахча-ҫимӗҫпе хӑйне туллин тивӗҫтерет. Экспорта ӑсатма та ҫителӗклӗ. Ҫӗр улми туса илесси икӗ хут ӳснӗ. Михаил Мишустин ҫак кӑтартупа уйрӑмах кӑсӑкланчӗ. Тухӑҫлӑх ӳссе пынинче вӑрлӑхпа ӗҫлекен хуҫалӑхсен тӳпи пысӑк.  Вӗсем усӑ куракан 38 сортран - 19-шӗ хамӑр ҫӗршывра кӑларнисем. Чӑваш Енӗн ыттисене кӑтартмалли, сӗнмелли тата пур. 

"Ылтӑн кӗркунне" курава юпа уйӑхӗн иккӗмӗш вырсарни кунӗнче паллӑ тӑвакан ял хуҫалӑхӗнче тата  тирпейлекен промышленноҫра ӗҫлекенсен кунне халалласа 1999-мӗш ҫултанпа йӗркелеҫҫӗ. Чӑваш Енри фермерсемпе ял хуҫалӑх предприятисем унта кашни ҫулах хутшӑнаҫҫӗ, пысӑк наградӑсене тивӗҫеҫҫӗ. - Хамӑра кӑтартни, ыттисен ӗҫӗпе паллашни паха, - теҫҫӗ вӗсем. 
Кӑҫал курава пухӑннисем пленарлӑ ларура отраслӗн 2030-мӗш ҫулчченхи аталанӑвне сӳтсе яврӗҫ. Тӗллевсене ҫӗнӗ наци проектӗнче палӑртнӑ. Вӑл апат-ҫимӗҫ хӑрушсӑрлӑхӗпе ҫыхӑннӑ, ҫитес ҫултан вӑя кӗрет.

Екатерина Фомина, Степан Гурьянов