Ӑмӑртӑва "Демографи" наци проекчӗпе килӗшӳллӗн аслӑ ӑрурисене сывӑ пурнӑҫ йӗркине явӑҫтарас тӗллевпе йӗркелеҫҫӗ. Ветерансем кун пек тӗл пулӑва виҫҫӗмӗш хут ирттереҫҫӗ. Вӗсем ытти спорт тӗсӗсемпе те тупӑшаҫҫӗ, ҫамрӑксене ырӑ тӗслӗх кӑтартаҫҫӗ. Хальхинче ветерансем волейболла выляса Михаил Романовӑн парнисемшӗн тупӑшрӗҫ. Ҫак кунсенче 70 ҫул тултарнӑскер,халӗ те спортпа туслӑ.
Юбиляра Муркаш округӗн пуҫлӑхӗн ҫумӗн тивӗҫне пурнӑҫлакан Зоя Дипломатова тата ытти хӑнасем саламларӗҫ. Физкультурӑпа спорт аталанӑвне пысӑк тӳпе хывнӑшӑн тав турӗҫ, хисеп хучӗсем парса чысларӗҫ.
Турнирта 7 команда тупӑшрӗ. Хӗрӳ ӑмӑртура Уйкас Янасал территори уйрӑмӗн команди пӗрремӗш вырӑна тухрӗ. Иккӗмӗшсем - муркашсем, виҫҫӗмӗш вырӑнта орининсем. Мала тухнисене дипломсемпе, кубоксемпе тата пылак парнесемпе чысларӗҫ.
Надежда Александрова, Иван Макеев
