"Мухтавлӑ 100 ҫул эсир пирӗнпе пӗрле" ятпа йӗркеленӗ курав ансамбле пуҫарса янӑ паллӑ ҫынсенчен пуҫласа хальхи пурнӑҫ аталанӑвӗ таранах сӑнлать. Уява килнӗ хӑнасене чи малтан архивра ӗҫлекенсем документсем упранакан вырӑнпа паллаштарчӗҫ. Курава пахалама ушкӑнри артистсем, сцена ветеранӗсем хутшӑнчӗҫ. Раҫҫей халӑх артисчӗ Юрий Васильев 40 ытла ҫул ансамблӗн пултарулӑх ертӳҫинче тӑрӑшнӑ.
Курав темиҫе пайран тӑрать. Коллектив кун-ҫулне пирвайхи хортан пуҫласа хальхи ансамблӗн ҫӗнӗ те пӗлтерӗшлӗ страницисем таранах сӑнланӑ. Кунта тӗрлӗ вӑхӑтри документсене, сӑн ӳкерчӗксене, афишӑсене курма пулать. Ушкӑн Тӑван ҫӗршывӑн Аслӑ вӑрҫи вӑхӑтӗнче те ӗҫлеме пӑрахман. Хыҫҫӑн та республикӑпа пӗрле аталаннӑ. Пӗрре мар чӑваш юрри-ташшипе чикӗ леш енчи куракансене тыткӑнланӑ.
Виртуаллӑ курава ахальлипе танлаштарсан чылай нумайрах материал кӗртме пулать. Ҫакӑ меллӗ пулнине палӑртрӗҫ экспозицие хатӗрлекенсем. Чӑваш патшалӑх юрӑпа ташӑ ансамблӗнчи артистсем те курава хапӑл туса йышӑнчӗҫ. Вӗсемшӗн те ушкӑн историпе тӗплӗнрех паллашни пӗлтерӗшлӗ.
Виртуаллӑ курава Хальхи истори архивӗн сайтӗнче вырнаҫтарнине пула унпа тӗнчен кирек хӑш кӗтесӗнче пурӑнакан та ҫӑмӑллӑнах паллашма пултарӗ. Ансамбль вара ҫитес ҫӗнӗ сезонра та куракансене пуян репертурпа тыткӑнлама хатӗрленет.
Оксана Верликова, Екатерина Янгалакова
