Республикӑран тухнӑ чӑваш офицерӗсен "Сыны Отечества" пӗрлешӗвӗ хӑй пуҫарнӑ ҫак ырӑ йӑлана ҫирӗп тытса пырать. Вӗсем тӑрӑшнипех хамӑр регионти чылай яш-кӗрӗм ҫар ҫулне суйласа илет. Шкулсенче уҫӑ уроксем ирттернин пӗлтерӗшӗ те пысӑк. Ачасем официрсен тӗслӗхӗпе тӑван ҫӗршыва юратма вӗренеҫҫӗ, ҫар ӗҫне ӑша хываҫҫӗ. Ку хутӗнче те уяв Ҫӗнтерӳ тӳремӗнче иртрӗ. Паллӑ мар салтак палӑкӗ умне 17 муниципалитетри 300 ытла ҫамрӑк армеец пуҫтарӑнчӗ. Конкурс пуҫланиччен йӑлана кӗнӗ йӗркепе хӑнасемпе хула ҫыннисем нихҫан сӳнмен ҫулӑм умне чечексем хучӗҫ. Тӑван ҫӗршыва хӳтӗлесе пуҫ хунисене асӑнса пӗр минут шӑп тӑчӗҫ. Кадетсен пултарулӑхне 5 енпе тӗрӗслерӗҫ. 19 ушкӑн хӗҫ-пӑшалпа усӑ курма тата ӑна салатса пуҫтарма пӗлнине кӑтарса пачӗ. Офицерсем ҫамрӑксем плацра командира мӗнле итленине, стройпа утмалли хӑнӑхтарусене йӑнӑшсӑр пурнӑҫланине тимлӗх уйӑрчӗҫ. Программӑна хул-ҫурӑм ҫирӗплӗхне тӗрӗсленине те кӗртнӗ. Каччӑсем турник ҫинче туртӑнчӗҫ пулсан, хӗрсем кӗлетке ҫӗклессинче тупӑшрӗҫ. Кадетсен ташӑра та ӑста пулмалла.
Паллах, ҫитӗнӳ тӑвас тесен ӑсталӑха пӗрмай туптамалла. Ҫавӑнпах пулӗ тӳресем конкурс шайӗ ҫулсерен лайӑхланса та лайӑхланса пынине палӑртрӗҫ.
Ҫӗнтерӳҫӗсене тӗрлӗ номинацире палӑртрӗҫ. Ҫав вӑхӑтрах кашни ушкӑн "Сыны Отечества" обществӑлла организацин дипломне тивӗҫрӗ. "Чи лайӑххи" ята вара Хӗрлӗ Чутай шкулӗнчи "Спарта" кадет ушкӑнӗ ҫӗнсе илчӗ. Вӗсем республика чысне Мускавра иртекен ҫӗршыв шайӗнчи фестивальте хӳтӗлӗҫ.
Леонид Петров, Денис Пахмутов, Виктор Степанов
