Ку хутӗнче Сызраньти вертолетчиксене хатӗрлекен училищене республикӑран 80 шкул ачипе кадет ҫула тухрӗ. Ку ӗҫ-пуҫа ҫӗршыври вертолетчиксен пӗрлешӗвӗн регионти уйрӑмӗн ертӳҫи, хӑй те ҫакӑнта пӗлӳ пухнӑ Геннадий Матвеев йӗркелесе пырать. Вӑл тӑрӑшнипе сахал мар ҫамрӑкӑн ӗмӗчӗ пурнӑҫланнӑ - ҫар летчикӗ пулса тӑнӑ. Ахальтен мар тӗл пулу вӑхӑтӗнче авиаци генерал-майорӗ, училищӗн тилхепине тытса пыракан Александр Асанов пирӗн республикӑра ҫамрӑксене патриотла воспитани парассипе пысӑк ӗҫ тунине палӑртрӗ. Кӑҫал делегаци йышӗнче Атӑл федераци округӗн Шупашкарти Кочетов ячӗпе хисепленекен кадет корпусӗнче, Ҫӗнӗ Шупашкарти кадет лицейӗнче, тӗп хулари 5-мӗш гимназипе ытти муниципалитетри шкулсенче вӗренекенсем пулчӗҫ. Пулас абитуриентсем курсантсем хатӗрленекен тренажерсем ҫинче хӑйсен вӑйне тӗрӗслесе пӑхрӗҫ. Ҫар йӗркипе, вӗренӳ ӗҫӗ-хӗлӗпе тӗплӗнрех паллашрӗҫ. Кунти музей ертӳҫи Виктор Куницин хӑнасене тӗрлӗ экспонатпа тата учрежденин историйӗпе паллаштарчӗ. Паллах экскурсие килекенсем те парӑмра юлмарӗҫ. Патриотизм анинче хастар тӑрӑшнӑшӑн училище ертӳҫи Александр Асанов кадетсен пӗрлешӗвӗн хисеплӗ пайташӗн ятне тивӗҫрӗ. Ҫавӑн пекех училищере нумай ҫул тӑрӑшакансене вертолетчиксен обществӑлла организацин медалӗсемпе чысларӗҫ.
Леонид Петров
