Йышӑнӑва килнисенчен пӗри - Алина Хоняк ҫамрӑк художник. Вӑл Вӑрнарта ҫуралса ӳснӗ, Шупашкарти ӳнер училищинче вӗреннӗ. Пӗлтӗр Питӗрти Илья Репин ячӗллӗ ӳнер академине пӗтернӗ. Диплом ӗҫне хӳтӗлеме Алина "Чӑваш туйӗ" картина ӳкернӗ. Ӑна вара академи Чӑваш Республикине парнеленӗ. Халӗ пысӑк ӳкерчӗк Наци библиотекинче тивӗҫлӗ вырӑн тупнӑ. Алина хӑй мӗн пултарнине республикӑри пулас художниксене те кӑтартма хатӗр. Ҫавна май хӗр ӳнер училищин студенчӗсем валли онлайн-курссем йӗркелеме сӗнчӗ. Ҫапла вӗсене малашне Питӗрти академине вӗренме кӗме ҫӑмӑлрах пулӗ. Ҫав вӑхӑтрах аспирантурӑна кӗме республикӑран квота кирлӗ. Ку ыйтӑва культура министерствипе татса парӑпӑр, терӗ Алла Салаева. Алина Хоняк ҫамрӑксемшӗн тӗслӗх пулнине те палӑртрӗ вӑл. Пултаруллӑ художник Питӗрте ӗҫлесе пурӑнать пулин те тӑван тӑрӑха манмасть.
Татьяна Ефимова та Вӑрнар тӑрӑхӗнчен культура ыйтӑвӗпе ҫитнӗ. Нурӑс салинче ӗлӗкхи купсасен ҫурчӗ пур. Ҫавӑнта истори музейӗ тӑвасшӑн. Ыйтӑва тӗплӗн пӑхса тухрӗҫ. Канашланӑ май, культура министрӗн пӗрремӗш ҫумӗ Татьяна Казакова ялти моделлӗ библиотекӑна музейпа пӗрлештерме сӗнчӗ. Самахран, ҫапла Канаш тӑрӑхӗнчи Шӑхасанта тунӑ.
Йышӑнӑва килнисем тӗрлӗ ыйту хускатрӗҫ. Лариса Мышева - республикӑри кӗмӗл волонтерсен координаторӗ. Анчах та вӗсен пӗрле пухӑнма уйрӑм кӗтӗс те, юридици адресӗ те ҫук.
Ӗҫлев тата социаллӑ хутлӗх министрӗ Алена Елизарова ку питӗ тӗрӗс шухӑш пулнине палӑртрӗ. Пӗрлехи ӗҫӗн витӗмӗ пысӑкрах пулнине каларӗ. Паянхи кун республикӑра 1100 кӗмӗл волонтер шутланать. Вӗсем тӗрлӗ ӗҫе хастар хутшӑнаҫҫӗ. Йышӑнӑва килнисем ҫӗкленӗ кашни ыйтӑва татса парӑпӑр, терӗ Алла Леонидовна.
Диана Иванова, Екатерина Янгалакова
