Кӑҫалхи фестивале тӗрлӗ регионти пӗр пин ҫурӑна яхӑн пултарулӑх ушкӑнӗ е 21 пин ытла ҫамрӑк актер хутшӑннӑ. Финала 14 регионтан 2-шер ӗҫ кӗнӗ. Пирӗн республика чысне Шупашкарти 53-мӗш шкулти театр студийӗ тата Чӑваш патшалӑх университетӗнчи "Кафедра" ушкӑн хӳтӗленӗ. Чӑваш студенчӗсем Антон Чеховӑн калавӗ тӑрӑх лартнӑ "Бабы" спектакльпе тупӑшнӑ. Фестивале пӗтӗмлетекен тӗп ӗҫ-пуҫ Удмурт Республикин тӗп хулинче Ижевскра иртрӗ.
Унта пур субъект та инҫет мелӗпе хутшӑнчӗ. Чи малтан финала тухнӑ спектакальсен сыпӑкӗсемпе паллаштарчӗҫ. Ун хыҫҫӑн кашни субъект чи лайӑх 5 региона суйларӗ. Ҫапла майпа сасӑлав пӗтӗмлетӗвӗ тӑрӑх Чӑваш патшалӑх университечӗн ушкӑнӗ чи нумай балл пухса пӗрремӗш вырӑна тухрӗ.
Пирӗн республикӑн ҫитӗнӳсем тата пулчӗҫ. "Чи лайӑх режиссер ӗҫӗ" номинацире Вячеслав Краснов мала тухрӗ. Юрӑ-кӗвӗпе илемлетнӗшӗн ҫӗнтерӳҫӗ ята Максим Лучинин тивӗҫрӗ. Ачасен театрӗпе ӗҫлекен Евгений Аввакумов вара "Художествӑлла илемлетнӗ чи лайӑх ӗҫ" номинацире ҫӗнтерчӗ. Шупашкарти 53-мӗш вӑтам шкулти театр студийӗ 14 субъект хушшинче 5-мӗш вырӑн йышӑнчӗ.
Конкурс йӗркелӳҫисем мала тухнисем валли сумлӑ парне хатӗрленӗ. Вӗсем "Гитисфест" ятпа иртекен вӗренӳ ҫул ҫӳревне хутшӑнӗҫ. Ун вӑхӑтӗнче ҫамрӑк актерсемпе паллӑ режиссерсем тата педагогсем ӗҫлӗҫ. Ҫӗнтерӳҫӗсене вара ака уйӑхӗн 15-18-мӗшсенче Удмурт республикинчи Воткинск хулинче чыслӗҫ.
Оксана Верликова, Михаил Солин
