Пӗтӗм ҫӗршыври пекех Чӑваш Енре те Совет Союзӗн тата Раҫҫей геройӗсен паттӑрлӑхне сума-суса вӗсем ҫуралса ӳснӗ тӑрӑхри шкулсенче асӑну хӑмисем уҫаҫҫӗ. Алла Салаева палӑртнӑ тӑрӑх, ку проекта Раҫҫейри ҫарпа истори пӗрлешӗвӗ пулӑшнипе пурнӑҫа кӗртеҫҫӗ. Пурӗ республикӑра 15 асӑну хӑми уҫмалла. Вӗсенчен иккӗшне - Кашмашри вӑтам шкулта. Александр Быковпа Юрий Майоровӑн ячӗсене вара ял халӑхӗ тӑрӑшнипе асра хӑварас тенӗ. Уява пуҫтарӑннӑ паттӑрсен тӑванӗсемпе шкул ачисем сумлӑ ентешӗсемпе мӑнаҫланнине каларӗҫ. Шкул ачисем паттӑрсене сума суса салтаксем евӗр утса тухрӗҫ.
Совет Союзӗн геройӗ Борис Васильев летчик-истребитель 5 уйӑхра 120 вӗҫев тунӑ, 63 ҫапӑҫӑва хутшӑнса 9 нимӗҫ самолетне тӗп тума ӗлкӗрнӗ. Мухтав Орденӗн тулли кавалерӗ Александр Быков та Тӑван ҫӗршывӑн Аслӑ вӑрҫин ҫулӑмӗ витӗр тухнӑ. Вӗсен тӗслӗхне кура Паттӑрлӑх Орденӗн икӗ хут кавалерӗ, Чечняри ҫапӑҫура хӑйӗн командирне ҫӑлнӑ, ятарлӑ ҫар операцинче вара тан мар ҫапӑҫура пуҫне хунӗ Юрий Майоровпа Чӑваш Республикинче Раҫҫей Геройӗн ятне пӗрремӗш тивӗҫнӗ Николай Смирнов та ҫитӗнсен ҫӗршыва хӳтӗлеме кар тӑнӑ.
Мемориал хӑмисем ҫинче паттӑрсен наградисене сӑнланӑ. Пухӑннисем чӗрӗ чечексем хучӗҫ, ентешӗсене асӑнса пӗр минут шӑп тӑчӗҫ. Асӑну паллисем ҫитӗнекен ӑрӑва ку тӑрӑхра ҫуралса ӳсне паттӑрсенчен тӗслӗх илмеллине аса илтерсе тӑрӗҫ.
Оксана Верликова, Михаил Солин
