"Раҫҫей хӑмли" конференцие тӗрлӗ тӑрӑхран килнӗ экспертсем, сӑра кӑларакан предприятисен специалисчӗсем, хамӑр регионти хӑмла ӳстерекен хуҫалӑх ертӳҫисем хутшӑнчӗҫ. Техӗмлӗ ҫимӗҫе туса илессипе ӗҫлеме хальхи вӑхӑтра патшалӑх ҫулсене пур енлӗн уҫса пырать. Регион шайӗнче те, ҫӗршывра та пулӑшу витӗмлӗ. Хӑмла ӳстернӗ, ӑна пӑхма, тирпейлеме техника туяннӑ, ҫӗрне апатлантарнӑ тӑкаксене саплаштараҫҫӗ. Тухӑҫа вырнаҫтарнӑшӑн укҫан хавхалантарни таранах. Ҫитес 10 ҫулта Чӑваш Енре техӗмлӗ сортлӑ хӑмла пахчисен лаптӑкне 2 пин гектара ҫитересшӗн. Ҫывӑх вӑхӑтра ятарлӑ программӑпа килӗшӳллӗн региона 1 миллиард та 800 миллион тенкӗ укҫа килмелле. Ӑна тӗллевлӗн те тӗрӗс усӑ курас ҫул-йӗре предприятисемпе пӗрле сӳтсе явма палӑртнӑ. Сӑмах май, "симӗс ылтӑн" пахчисем халӗ республикӑри 10 хуҫалӑхӑн пур. Конференцире палӑртнӑ тӑрӑх, аталану ҫул-йӗрӗнче укҫа-тенкӗ ыйтӑвӗ чӑрмав мар, пӗрле тӗллевлӗн ӗҫлени, палӑртни патне ҫирӗппӗн утни паха. Хӑмла туса илессипе ҫыхӑннӑ ыйтусене сӳтсе явнисӗр пуҫне форумра "Балтика" компанипе Чӑваш патшалӑх аграри университечӗ килӗшӳ турӗҫ.
Алиса Александрова, Святослав Петров
