Пӗрремӗш хут иртекен ӑмӑртӑва 11 команда хутшӑнчӗ. Шкул ачисем тӗрлӗ ӳсӗмри ушкӑнра тупӑшрӗҫ, предприяти-организацисенче ӗҫлекенсем те старта тухрӗҫ. Василий Федоров генерал-майора халалласа спорт турнирӗ ирттерес шухӑш айӑплава пурнӑҫлакан федераци службин Чӑваш Енри управленийӗнче ҫуралнӑ. Тӑвайсем ҫак пуҫарӑва хапӑлласах йышӑннӑ.
Ӑмӑртӑва хутшӑнакансене ентешӗн пурнӑҫӗ, ӗҫӗ-хӗлӗ пирки тӑванӗсем, ӗҫтешӗсем каласа кӑтартрӗҫ. Василий Федоров Тӗмер ялӗнче 1960-мӗш ҫулта ҫуралнӑ. 1984-мӗш ҫулта ҫар хӗсметне тӑнӑ, Афганистанри хирӗҫ-тӑрӑва хутшӑннӑ. Салтакран таврӑнсан юсанмалли учрежденире тӑрӑшнӑ. Каярах Раҫҫей шалти ӗҫсен министерствин Управленийӗн академинче пӗлӳ илнӗ. 2000-мӗш ҫулта ӑна Мускава юстици министерствине куҫарнӑ. Айӑплава пурнӑҫлакан федераци службин аталанӑвне хывнӑ тӳпи те пысӑк. Сӑмах май, Василий Федоров ҫак тытӑмра ӗҫлесе генерал званине илнӗ Чӑваш Енри пӗрремӗш ҫын.
Тупӑшӳ хӗрӳ иртрӗ. 800 метрлӑ дистанцие парӑнтарма тиврӗ спортсменсен. Кашни ушкӑнра тӑватшар ҫын. Ӑмӑртакансем те, вӗсене хавхалантаракансем те хастар пулчӗҫ. Уяр ҫанталӑк та кӑмӑла ҫӗклерӗ. Ҫӗнтерӳҫӗсем кубоксемпе медальсене тивӗҫрӗҫ. Ҫитес ҫул эстафетӑна ытти муниципалитетсене те хутшӑнма йыхравласшӑн йӗркелӳҫӗсем.
Екатерина Фомина
