Шӑпах Атӑк ҫӑлкуҫӗ тапса тӑракан тӗлте темиҫе ӗмӗр каялла ял пуҫланса кайнӑ тесе шутлаҫҫӗ татмӑшсем. Ҫумӑр чылай хушӑ ҫумасан е ытти сӑлтавпа кунтах чӳк ирттернӗ. Халӗ те халӑх ҫӑл таврашне сӑваплӑ вырӑн пек йышӑнать. Ӑна ҫут ҫанталӑк паркӗ тӑвас тӗллевпе ҫулран-ҫул пысӑк ӗҫсем пуҫараҫҫӗ.
Юмансем, хыр-чӑрӑш та вӑй илсе ҫӳлелле кармашма пуҫланӑ. Тӑван ҫӗршывӑн Аслӑ вӑрҫинче ҫӗнтернӗренпе 77 ҫул ҫитнӗ тӗле лартнӑ 77 кедр тӗрӗс-тӗкел ӳсет. Кану кунӗсенчи ыр ҫанталӑкпа усӑ курса татмӑшсем пӗрле пухӑнса йывӑҫсен таврашне тасатса кӑпкалатнӑ. Пилеш ҫуркунне хитре ҫурӑлса кӗркунне хӗрлӗ ҫырлисемпе илӗртнине кура 30 хунав лартса хӑварнӑ. Татмӑшра пурӑнакансен шучӗпе пурӑна киле ҫак йывӑҫ шутне 300 ҫитересшӗн.
Экологи ҫулталӑкӗ пынӑ май Чӑваш Енре ҫӑлкуҫсен таврашне хӑтлӑх, тирпей-илем кӳнине шута илсе конкурс ирттернӗ. Унта шӑпах Атӑк ҫӑлкуҫӗн таврашне тимлесе тӑракан татмӑшсем ҫӗнтернӗ. Ял халӑхӗн тӗллевӗсем татах та пур. Малашлӑхра темиҫе ӗмӗр хушши ку тӑрӑхра пурӑннӑ йӑхсене халалласа 12 шурӑ палӑк лартса парк йӗркелесшӗн.
Алиса Александрова, Николай Семенов
